Samarqandda “‘Kamalak’ bilimdonlari” respublika ko‘rik-tanlovining viloyat bosqichi bo‘lib o‘tdi, deb xabar bermoqda O‘zA.
“Kamalak” bolalar tashkiloti faoliyatini qo‘llab-quvvatlash va ijtimoiy nufuzini oshirish, umumta’lim maktablari o‘quvchilarining bilim va iqtidorini ro‘yobga chiqarish maqsadida “Kamolot” yoshlar ijtimoiy harakati tomonidan har yili an’anaviy tarzda o‘tkazib kelinayotgan tadbirda tanlovning tuman va shahar bosqichlarida g‘oliblikni qo‘lga kiritgan jamoalar ishtirok etdi.
Tanlov to‘rt yo‘nalishda tashkil etilib, o‘quvchilar taqdimot, sahna ko‘rinishi, savol-javob va o‘zlari tayyorlagan ijtimoiy loyihalar orqali o‘z salohiyatlarini namoyish etdi.
Samarqand tumanidagi 37-umumta’lim maktabining “Barkamol avlod” jamoasi birinchi o‘rinni egallab, tanlovning respublika bosqichida qatnashish huquqini qo‘lga kiritdi.
O‘zA ma’lumotlariga ko‘ra, Buxoroda ham ushbu ko‘rik-tanlovning viloyat bosqichi bo‘lib o‘tdi. Unda 13 jamoa o‘zaro bahslashdi.
Tanlovda ishtirokchilar she’r, qo‘shiq, monolog, slaydlar vositasida o‘z jamoasini tanishtirib, bolalar o‘rtasidagi ayrim muammolar va ularning yechimlari aks etgan sahna ko‘rinishlarini namoyish etdi.
Kogon shahridagi 5-umumta’lim maktabining “Shumtakalar” jamoasi birinchi o‘rinni egalladi va tanlovning mamlakat bosqichiga yo‘llanma oldi.
– Tashkilot ishining samaradorligi ko‘p jihatdan sinf sardorlariga bog‘liq, – deydi 5-umumta’lim maktabi “Kamalak” boshlang‘ich tashkiloti yetakchisi Zarnigor Ubaydullayeva. – Shuning uchun ularning faolligini yanada oshirish maqsadida “Har bir kuning mazmunli o‘tsin” ijtimoiy loyihasi ishlab chiqildi. Unga ko‘ra, darsdan so‘ng sinf sardorlari ishtirokida huquqiy madaniyat, kamalak kuni, iqtidorli bolalar bilan ishlash, ma’naviyat va sport tadbirlari o‘tkazilmoqda. Mazkur loyihamiz mutaxassislar tomonidan yuqori baholandi.
Tadbir doirasida tashkilot faoliyati samaradorligini yanada yuksaltirishga qaratilgan loyihalar taqdimoti o‘tkazildi.
Izoh (0)