Mirzo Ulug‘bek nomidagi O‘zbekiston Milliy universiteti O‘zbek filologiyasi fakulteti talabalari tomonidan tashkil etilgan Alisher Navoiy hayoti va ijodiga bag‘ishlangan sayt rasman ish boshladi.
Sayt rahbari, filologiya fanlari nomzodi, navoiyshunos olima Dilnavoz Yusupova sayt haqida shunday dedi:
Buyuk shoir Alisher Navoiyning hayoti va ijodini yoritishga bag‘ishlangan biror sayt hali mavjud emas edi.Ayni paytda saytga bir necha ilmiy maqolalar hamda Alisher Navoiy g‘azallari tabdil qilingan materiallar joylashtirilgan bo‘lib, bu ishlarni mukammalashtirish bilan bog‘liq harakatlar amalga oshirilmoqda. Saytni yanada faollashtirish uchun barcha mutaxassis olimlarni jalb qilish nazarda tutilgan.To‘g‘ri, Alisher Navoiy nomidagi O‘zbekiston Milliy kutubxonasining rasmiy saytida Alisher Navoiyning 20 jildlik mukammal asarlar to‘plami joylashtirilgan, ammo bu yetarli emas. Chunki hazrat Navoiyni xalqqa sharhlab, asarlarini tabdil qilgan holda yetkazish davr talabiga aylandi.
Mazkur ish mana shu niyatda qo‘yilgan qadamlardan biri. Sayt tashkil etishda, asosan, talabalarimiz tashabbus ko‘rsatdi.
Qolaversa, bu yo‘lda beminnat yordam ko‘rsatgani uchun “Muloqot” saytlar tarmog‘i rahbari Farhod Fayzullayev hamda shu saytning mas’ul xodimlaridan biri Behzod Xo‘janazarovga o‘zimizning samimiy minnatdorchiligimizni bildiramiz.
Sayt “Muloqot” saytlar tarmog‘i doirasida ishga tushirilgan bo‘lib, u “Muloqot” tizimi bilan to‘liq integratsiyalashgan. Sayt texnik jihatdan “Muloqot” mutaxassislari va resurslari tomonidan qo‘llab-quvvatlanadi.
Eslatib o‘tamiz, “Muloqot” saytlar tarmog‘iga “Daryo” internet-nashridan tashqari “Muloqot” ijtimoiy tarmog‘i, “Intervyu”, “Muloqot ob-havo” saytlari, huquqshunos Xushnudbek Xudayberdiyevning shaxsiy sayti, qiziqarli faktlar haqida so‘z yurituvchi “Turfa olam”, ingliz tilini o‘rganishda ko‘maklashuvchi English Club Pro, “Doim onlayn” asari, Enne — muhandislar blogi va boshqa saytlar kiradi.
Izoh (0)