Twitter mikrobloglar servisida ro‘yxatdan o‘tgan foydalanuvchilar ko‘p, ammo ularning ko‘pchiligi biror faollik namoyon etmaydi, deb yozadi Wall Street Journal gazetasi.
Hozirgi kunda mikrobloglar xizmatining 972 million nafar foydalanuvchisi mavjud, biroq ulardan 44 foizining profilida bitta ham tvit yozilmagan. Bu fakt butun dunyo bo‘ylab barcha shaharlardagi nufuzli mikroblogerlarni izlash bilan shug‘ullanuvchi Twopcharts.com servisi hisobotlaridan ma’lum bo‘ldi.
Aniqlanishicha, Twitter foydalanuvchilarining 30 foizi bittadan o‘ntagacha tvit yozishgan. 100 dan ortiq tvit yozganlar esa atigi 13 foizni tashkil etadi. Servisdan faol foydalanib kelayotganlar soni 542,1 million kishiga yetadi; ulardan 23 foizi keyingi bir oy davomida kamida bittadan tvit yozgan.
TJournal nashrining ta’kidlashicha, Twopchart servisi foydalanuvchi o‘z akkauntidan qachon foydalanganligi, unga qanchalik tez-tez kirib turishi kabilarni aniqlay olmaydi. U profil egasining faolligini biror tvit qoldirganligi va boshqalarning profillaridan retvit qilganligiga qarabgina aniqlay oladi.
Foydalanuvchining o‘z akkauntiga kirishlarini faqat Twitter’ning o‘zigina aniqlashi mumkin. 2013-yilning oxirgi uch oyi statistikasiga qaraganda, Twitter’ning 241 million nafar a’zosi kamida oyda bir marta o‘z profiliga kirgan.
Aytish kerakki, Twopcharts taqdim etgan ma’lumotlarni Twitter tasdiqlagani yo‘q. Mikrobloglar xizmati ma’muriyati uchinchi shaxslar to‘plagan statistikani izohlamasligini ma’lum qildi.
Wall Street Journal gazetasining eslatib o‘tishicha, tvit yozmasligi kishining bu servisdan foydalanmasligini anglatmaydi. Ko‘pchilik a’zolar o‘zlari qiziqqan akkauntlarning yangiliklariga obuna bo‘lib qo‘yishgan va ularni o‘qib, bironta izoh yozmasdan chiqib ketishlari ham tabiiy hol.
Izoh (0)