Chirchiq olimpiya zaxiralari kollejida dzyudo bo‘yicha 1994—1995-yillarda tug‘ilgan yoshlar o‘rtasida O‘zbekiston chempionati bo‘lib o‘tdi, deb xabar bermoqda O‘zA.
Musobaqa O‘zbekiston Madaniyat va sport ishlari vazirligi, sharq yakkakurashlari va jang san’atlarini rivojlantirish markazi va dzyudo federatsiyasi hamkorligida tashkil etildi.
Umumjamoa hisobida xorazmlik dzyudochilar birinchi, Toshkent viloyati vakillari ikkinchi va samarqandlik polvonlar uchinchi o‘rinni egalladi.
Qizg‘in va murosasiz bellashuvlarda navoiylik G‘ofur Aktamov, samarqandlik Doston Holiqulov, qashqadaryolik Ma’ruf Xidirov, Toshkent viloyatidan Rahimjon Subhonov, Doston Meyliyev, Muhriddin Mirzayorov, surxondaryolik Romish Rahmatov va poytaxtlik Azamat Bahodirzoda o‘z vazn toifasida barcha raqiblaridan ustun kelib, O‘zbekiston chempioni unvonini qo‘lga kiritdi. Mutlaq vaznda xorazmlik Umarbek Ro‘zmamatovga teng keladigani topilmadi.
Qizlar o‘rtasidagi musobaqalarda andijonlik Matluba Abdumutalova, xorazmlik Dilnoza Sultonova, Zarifa Sultonova, Tursunposhsha Nurmatova, Kumush Yo‘ldosheva, qoraqalpog‘istonlik Omongul Allanazarova, samarqandlik Iqbol Akramova va poytaxtlik Dilyora Berdiyeva shohsupaning eng yuqori pog‘onasiga ko‘tarildi. Mutlaq vaznda xorazmlik Tursunposhsha Nurmatova g‘alaba qozondi.
Izoh (0)