Ukraina Ichki ishlar vazirligi mamlakatda, xususan, Donetsk, Xarkov va Lugansk viloyatlaridagi ommaviy tartibsizliklarga nisbatan qattiqqo‘llik bilan munosabatda bo‘lishini ma’lum qildi. Bu haqda “RIA Novosti” xabar qilmoqda.
Mart oyining boshida Ukraina hukumati mamlakatning sharqiy hududlarida rus tiliga alohida maqom beruvchi qonunni bekor qilishga uringan va ko‘pchilik gubernatorlarni almashtirgan edi. O‘shandan buyon Donetsk, Xarkov va Luganskda mamlakatni federalizatsiya qilish tarafdorlari har dam olish kunlari namoyish o‘tkazib kelishmoqda.
Ammo keyingi kunlardagi noroziliklar kuchayib bormoqda: namoyishchilar bir necha kundan buyon tarqalishmayapti. Shu sababli, 9-aprel kuni Ukraina ichki ishlar vaziri Arsen Avakov bu muammolarni 48 soat ichida, muzokaralar o‘tkazish yoki kuch ishlatish yo‘li bilan hal etishga va’da bergan.
“Butun Ukraina hududi bo‘ylab, ayniqsa, vaziyatni tartibga solish va ayirmachilikni bartaraf etish bo‘yicha maxsus operatsiyalar o‘tkazilayotgan Donetsk, Lugansk va Xarkov viloyatlarida barqarorlikni ongli ravishda buzish, jamoat tartibini buzish va ommaviy tartibsizliklar holatlariga nisbatan qattiqqo‘llik bilan munosabatda bo‘ladi”, – deyiladi mamlakat IIV xabarida.
Izoh (0)