Rossiya prezidenti Vladimir Putin mamlakat Xavfsizlik kengashining yig‘ilishida so‘zga chiqib, Yevropaning 18 davlati rahbarlariga yuborgan xatiga AQSh Davlat departamenti a’zolari munosabat bildirganligini g‘alati, deb atadi. Bu haqda “ITAR-TASS” xabar qilgan.
Putin 10-aprel kuni yo‘llagan maktubda yetkazib berilgan gaz uchun Ukrainaning qarzi ko‘payib ketganligi sababli yuzaga kelgan murakkab vaziyat batafsil ko‘rsatilgan. Shuningdek, bo‘layotgan voqealar Rossiya gazi Yevropaga tranzit tarzda olib o‘tilishiga qanday ta’sir etishi mumkinligi ham bayon etilgan. Prezident muammoni hal qilish bo‘yicha bir qator takliflar bergan.
Yig‘ilish davomida Rossiya tashqi ishlar vaziri Sergey Lavrov prezidentning xati o‘z egalariga yetkazilganligini ma’lum qildi. Bunda u maktubga birinchi bo‘lib Vashington munosabat bildirganligini ham aytib o‘tdi. Xususan, AQSh Davlat departamenti maktubni “gaz shantaji”, deb atagan va Rossiya o‘zining Ukraina bilan o‘rtalaridagi ishlarini siyosiylashtirmasligi, balki bozor narxlariga amal qilishi lozimligini ta’kidlagan
Putin bu bo‘yicha Lavrovga javoban bunday degan: “Birmuncha g‘alati. Nima bo‘lganda ham, birovlarning xatini o‘qish yaxshi emas. Maktub ularga emas, balki Yevropadagi gaz iste’molchilariga atalgan. Amerikalik do‘stlarimiz yashirincha quloq solishlariga hamma ko‘nikib qolgan; birovlarning xatiga o‘g‘rincha qarash – nojo‘ya ish”.
Oradan bir necha soat o‘tib, AQSh Davlat departamentining rasmiy vakili Jen Psaki bunga javob bergan. U Yevropa mamlakatlari rahbarlariga yo‘llangan maktubga munosabat bildirishga AQShning huquqi borligini, chunki u Moskvada ochiq tarzda e’lon qilinganligini ta’kidlagan.
“Oshkora tarzda e’lon qilingan xatga munosabat bildirish esa kimningdir shaxsiy yozishmalariga aralashish hisoblanmaydi”, – dedi Jen Psaki.
AQSh Davlat departamentining rasmiy vakili Putinning xati Ukrainaga energiya yetkazib beruvchilarga ham aloqador ekanligini eslatgan va “shu sababli bu muammo bizga ham taalluqli”, – degan.
Izoh (0)