Odessa fashist bosqinchilaridan ozod qilinganligining 70 yilligi nishonlanishi siyosiy ziddiyatlar sababli to‘xtatildi. Mojaro va ig‘volar natijasida Kiyevning yangi hukumati tarafdorlari ham, unga qarshilar ham viloyat rahbariyati bilan kelishib, bayramni nishonlashdan voz kechishdi. Bu haqda “ITAR-TASS” xabar qilmoqda.
Faxriylarni tabriklash uchun borgan xalq deputati, Ukraina prezidentligiga nomzod Sergey Tigipkoga Yevroittifoqqa qo‘shilish tarafdorlari tuxum otdilar. “Menimcha, mamlakatda shunday vaziyat yuzaga kelganligiga siyosatchilar aybdor”, – deya izohladi bu holatni Tigipko. U bo‘lib o‘tgan voqeani “siyosiy ig‘vo”, deb atadi.
Odessalik namoyishchilarning yana bir guruhi esa “Promenad” mehmonxonasini o‘rab olishdi. Ular bu yerda prezidentlikka yana bir nomzod, xalq deputati Oleg Sarev joylashgan, deb hisoblashar edi. Namoyishchilar millatchilik ruhidagi shiorlarni aytib baqirishdi, siyosatchini “munosib kutib olish” uchun tuxum, zelyonka va boshqa narsalar tayyorlab qo‘yishdi.
Deputatni himoya qilish uchun voqea joyiga “Xalq drujinasi” va Kiyev hukumatiga qarshi chiquvchi boshqa jamoat tashkilotlarining faollari yetib kelishdi. Oqibatda ko‘chada mushtlashish boshlandi, mehmonxonaga yetib kelgan militsiya va to‘liq qurollangan maxsus bo‘linma xodimlari ularni ajratib qo‘yishdi.
To‘qnashuvlar natijasida bir necha kishi jarohatlandi, avtomobillarga zarar yetdi.
Izoh (0)