Buxoroda umumta’lim maktablari o‘quvchilari o‘rtasida o‘tkazilayotgan “Ingliz tili bilimdoni” respublika intellektual musobaqasining viloyat bosqichi bo‘lib o‘tdi. Bu haqda O‘zA ma’lum qildi.
Musobaqada jamoalar o‘qish va yozish, og‘zaki nutqni rivojlantirishga qaratilgan shartlar bo‘yicha o‘z bilimini sinovdan o‘tkazdi. Shuningdek, berilgan mavzu bo‘yicha tayyorlangan sahna ko‘rinishlari orqali ingliz tilida so‘zlashish malakasi va aktyorlik mahoratini namoyish etdi.
Ayni paytda viloyatdagi umumta’lim maktablarida ingliz, fransuz, nemis va ispan tillari o‘qitilmoqda. 533 ta’lim muassasasida qariyb 124 ming nafar o‘quvchi ingliz tilini o‘rganmoqda.
Buxoro shahri jamoasi birinchi o‘rinni egalladi. Ikkinchi va uchinchi o‘rinlarni G‘ijduvon va Buxoro tumanlari jamoalari qo‘lga kiritdi.
– Maktabimizda chet tilini chuqur o‘rganish uchun barcha sharoitlar mavjud, – deydi Buxoro shahri jamoasi vakili, 38-umumta’lim maktabi 9-sinf o‘quvchisi Mironshoh Vosiyev. – Lingafon va kompyuter xonalari biz, o‘quvchilar ixtiyorida. Ingliz tilining nazariy asoslarini o‘rganish barobarida erkin muloqot qilish ko‘nikmasini mustahkamlashga ham alohida e’tibor qaratilmoqda. Musobaqaning mamlakat bosqichida ham muvaffaqiyatli ishtirok etib, birinchi o‘rinni egallashga ahd qilganmiz.
Izoh (0)