“Turkiston” saroyida O‘zbekiston Respublikasi Prezidenti sovrini uchun “Tashabbus—2014” ko‘rik-tanlovining g‘oliblarini taqdirlash marosimi bo‘lib o‘tdi, deb xabar bermoqda O‘zA.
Tadbir O‘zbekiston Savdo-sanoat palatasi tomonidan Fermerlar kengashi va “Hunarmand” uyushmasi, tegishli vazirlik va idoralar ko‘magida tashkil etildi.
G‘oliblar uchta asosiy – “Yilning eng yaxshi tadbirkori”, “Yilning eng yaxshi fermeri” va “Yilning eng yaxshi hunarmandi” yo‘nalishlari, shuningdek, “Yilning eng yosh tadbirkori”, “Yilning eng yaxshi tadbirkor ayoli”, “Eng yaxshi innovatsion loyiha”, “Yoshlar uchun eng ko‘p ish o‘rinlarini tashkil qilgan tadbirkor”, “Eng yaxshi oilaviy biznes”, “Mening Vatanim – mening faxrim” hamda “Yilning eng yaxshi eksportchisi” kabi maxsus nominatsiyalar bo‘yicha aniqlandi.
“Yilning eng yaxshi tadbirkori” nominatsiyasida Namangan viloyatidagi “Iftixor kiyim sanoat” mas’uliyati cheklangan jamiyati direktori Anna Dobrix g‘olib bo‘ldi. Uning korxonasi bolalar, erkaklar va ayollar liboslarini ishlab chiqarishga ixtisoslashgan.
Sirdaryo viloyatidagi “Ahmadiy” fermer xo‘jaligi rahbari Bahodir Kenjayev eng yaxshi fermer deb topildi. U rahbarlik qilayotgan xo‘jalik paxta va g‘alla yetishtirish, qoramol parvarishlash, go‘sht va sut mahsulotlari ishlab chiqarish bilan shug‘ullanadi.
Andijon viloyatidan Abdimalik Madraimov yilning eng yaxshi hunarmandi, deb e’lon qilindi. Usta milliy musiqa asboblari tayyorlashning unutilgan an’analarini qayta tiklamoqda.
“Tashabbus—2014” ko‘rik-tanlovi g‘oliblariga diplomlar va Prezident Islom Karimovning sovrini – “Spark” avtomobillari, maxsus nominatsiyalar sovrindorlariga esa pul mukofotlari va qimmatbaho sovg‘alar topshirildi.
Ta’kidlash joiz, joriy yilda ushbu ko‘rik-tanlovda 10 000 nafarga yaqin tadbirkor, fermer va hunarmand ishtirok etdi. Fevral oyi oxirida yakunlangan tuman va shahar bosqichlari g‘oliblari viloyat bosqichida qatnashish huquqini qo‘lga kiritdi. Viloyat bosqichlarining eng munosib 41 nafar g‘olibi esa “Tashabbus—2014” ko‘rik-tanlovining mamlakat bosqichiga chiqdi.
O‘zbekistonda tadbirkorlik faoliyati keng qo‘llab-quvvatlanayotgani samarasida o‘tgan yili mamlakatda 26 mingdan ziyod yangi kichik biznes subyekti ish boshladi va ushbu sektorda faoliyat ko‘rsatayotgan korxonalarning umumiy soni 190 mingtaga yetdi. Ayni paytda mamlakatimizda ishlab chiqarilayotgan sanoat mahsulotlarining 23 foizi, ko‘rsatilayotgan bozor xizmatlarining deyarli barchasi, eksportning 18 foizi, iqtisodiyot tarmoqlarida ish bilan band bo‘lgan aholining 75 foizi kichik biznes ulushiga to‘g‘ri kelmoqda.
Izoh (0)