Mobil telefondan faol foydalanuvchi o‘zbekistonliklar uchun Global Solutions kompaniyasi Prefix dasturini ishlab chiqdi. Bu haqda UZINFOCOM markazining korporativ blogi ma’lum qilmoqda.
Ayrim abonentlar biror telefon raqamini yozib qo‘yayotganida, mobil operator prefiksini (kodini) yozishmaydi. Shu boisdan keyinchalik bu raqamga SMS-xabar yuborishda yoki qo‘ng‘iroq qilishda muammolar yuzaga kelishi mumkin. Shuni inobatga olib, Global Solutions kompaniyasi muammoning ajoyib yechimi bo‘lmish Prefix mobil dasturini ishlab chiqdi.
Dastur “telefon kitobchasi”dagi barcha telefon raqamlarining prefikslarini bir zumda aniqlash va yangilashga yordam beradi. U prefikssiz (kodsiz) yozilgan telefon raqamlarining qaysi kompaniyaga tegishli ekanligini bilishga ko‘maklashadi.
Prefix’ning ishlash mexanizmi juda oddiy – u “telefon kitobchasi”ni tekshirib chiqadi va qaysi raqamlarga prefiks qo‘yilmaganligini ko‘rsatadi. Bu raqam qaysi mobil operatorga yoki shahar telefon tarmog‘iga tegishli ekanligini aniqlab, uni qo‘shib qo‘yishga ruxsat so‘raydi va rozilik berilsa, raqamga prefiksni qo‘shib, yangilab qo‘yadi.
Dastur O‘zbekistonda amalda bo‘lgan barcha mobil operator kompaniyalari va davlat telefon tarmog‘ini o‘ziga qamrab olgan. U “MTS” uyali aloqa kompaniyasiga tegishli raqamlarni aniqlay olmaydi. Prefix o‘zbek, rus va ingliz tillarida ishlaydi.
Hozirda Prefix’ning beta-versiyasi chiqarilgan bo‘lib, faqat O‘zbekistondagi raqamlarning prefikslarini aniqlab beradi. Telefon sohibi dasturni yuklab, o‘rnatib olgach, tilni tanlab, undan foydalana boshlashi mumkin.
Dasturning afzalliklari quyidagilardan iborat:
- Foydalanuvchi telefonidagi raqamlarga prefikslar qo‘yish imkoniyati;
- Muayyan raqamning qaysi operatorga tegishliligini foydalanuvchining o‘zi tanlashi mumkinligi;
- O‘zbekistonning barcha shaharlari prefikslarini tanlash imkoniyati;
- Uchta tildan birini – o‘zbek, rus yoki ingliz tilini tanlash mumkinligi.
Izoh (0)