11-aprel, juma kuni Yevropa futbol assotsiatsiyalari uyushmasi (UEFA)ning Shveysariyaning Nyon shahridagi bosh qarorgohida Chempionlar Ligasi hamda Yevropa Ligasi yarim final bahslariga qur’a tashlash marosimi bo‘lib o‘tadi. Bu haqda “ITAR-TASS” xabar berdi.
Chempionlar Ligasi yarim finaliga qur’a tashlash marosimigacha ikki ispan klubi — Madridning “Real” va “Atletiko”, Londonning “Chelsi” hamda kubokning amaldagi sohibi Myunxenning “Bavariya” klublari yetib kelishgan edi. Yashirin qur’a tamoyillariga ko‘ra ushbu jamoalar juflikka bo‘linadi va dastlabki o‘yinlarning mezboni aniqlanadi. Bundan tashqari, mazkur qur’a orqali 24-may kuni Lissabondagi “Da Lush” stadionida bo‘lib o‘tadigan final bahsining mezboni ham aniqlanadi.
Qur’a tashlash marosimini UEFA bosh kotibi Janni Infantino boshqaradi. Unga bu ishda YeChL finali elchisi, yaqin o‘tmishning mashhur futbolchisi Luish Figu yordamlashadi.
Yarim final o‘yinlari 22—23- hamda 29—30-aprel kunlari bo‘lib o‘tadi.
Aynan shu tizimda Yevropada nufuzi jihatidan ikkinchi sanalgan Yevropa Ligasi turnirining yarim final bahslari uchun ham qur’a tashlash marosimi o‘tkaziladi. Ushbu turnirda ikki ispan jamoasi—“Sevilya” va “Valensiya”, Portugaliyaning “Benfika” hamda Italiyaning “Yuventus” jamoalari o‘z raqiblarini bilib oladi.
Yevropa Ligasining yarim final bahslari 24-aprel hamda 1-may kunlari bo‘lib o‘tadi. Musobaqaning final o‘yini 14-may kuni Italiyaning Turin shahridagi “Yuventus-Arena” stadionida o‘tkaziladi. Yevropa ligasining qur’a tashlash marosimida Janni Infantinoga final bahsining elchisi, “Yuventus” va Italiya terma jamoasining sobiq o‘yinchisi Chiro Ferrara ko‘mak beradi.
Izoh (0)