Toshkentda yoshlarni “ommaviy madaniyat”ning salbiy ta’siridan asrashga qaratilgan festival o‘tkazildi

Alisher Navoiy nomidagi O‘zbekiston Milliy bog‘ida “Biz – buyuk yurt farzandlarimiz!” shiori ostida yoshlar festivali bo‘lib o‘tdi. O‘zbekiston mustaqilligining 23-yilligiga bag‘ishlangan ushbu festival Toshkent shahar hokimligi, “Kamolot” yoshlar ijtimoiy harakati shahar kengashi, “O‘zbeknavo” estrada birlashmasi hamkorligida tashkil etildi, deb xabar berdi O‘zA.

Festival doirasida maktablar, kollej va litseylar, mehribonlik uylarida “Yoshlar – sog‘lom turmush tarzi tarafdori”, “Har bir inson mehr-e’tiborda”, “Ommaviy madaniyat va yoshlar ma’naviyati”, “Deputat va yoshlar”, “Hokim va yoshlar”, “Zamonamiz qahramonlari” mavzusida yozuvchi va shoirlar, kino va teatr aktyorlari bilan uchrashuvlar, kitobxonlikni keng targ‘ib qilishga qaratilgan loyihalar, sport musobaqalari tashkil etildi.

– Festivalda tengdoshlarimiz bilan faol ishtirok etdik, – deydi Toshkent davlat yuridik universiteti talabasi Dilshod Avezov. – Ommaviy tahdidlar va yoshlar ma’naviyati, odam savdosi va uning salbiy oqibatlari, axborot xurujlari va ulardan himoyalanishga oid dolzarb mavzulardagi muloqotlar huquqiy bilim va dunyoqarashimizni yanada mustahkamlashga yordam berishi shubhasiz.

Milliy bog‘da yosh hunarmand va tadbirkorlarning ijodiy ishlari hamda mahsulotlari ko‘rgazmasi, kitoblar savdosi tashkil etildi. “Har bir yoshga bir nihol” loyihasi bo‘yicha ko‘chat ekish aksiyasi o‘tkazildi.

Taniqli san’atkorlar va yosh ijrochilar ishtirokidagi gala-konsert barchaga ko‘tarinki kayfiyat bag‘ishladi.