“Toshkent” respublika fond birjasi bilan Yaponiya fond birjasi o‘rtasida hamkorlik to‘g‘risida memorandum imzolandi, deb xabar bermoqda O‘zA.
Qimmatli qog‘ozlar bilan muomala ko‘lami bo‘yicha jahondagi eng ilg‘or tashkilotlardan biri bo‘lgan Yaponiya fond birjasi bilan imzolangan memorandum O‘zbekiston va Yaponiya qimmatli qog‘ozlar bozorlarini yanada rivojlantirish, ikki mamlakatning fond bozorlarini o‘rganish, o‘zaro tajriba va axborot almashishga yo‘naltirilgandir.
– Mamlakatlarimiz o‘rtasidagi hamkorlik izchil rivojlanib borayotgani bizni g‘oyat quvontiradi, – dedi Yaponiya fond birjasi boshqaruv menejeri Kotaro Yamazava. – Mazkur memorandum qimmatli qog‘ozlar sohasidagi aloqalarimizni yanada rivojlantirishga xizmat qiladi. O‘zbekistonlik sheriklarimiz bilan hamkorlikni mustahkamlash va kengaytirishdan manfaatdormiz.
Memorandumga muvofiq anderrayting va listing tartibotlari, bozor holati tahlili bo‘yicha axborot almashiladi, fond bozorini rivojlantirishda aksiyadorlik kompaniyalarining ishtiroki yanada kengaytiriladi.
Ma’lumot o‘rnida: O‘zbekistonning barcha hududlarida 100 dan ortiq brokerlik idoralariga ega “Toshkent” respublika fond birjasi qimmatli qog‘ozlar bozorida asosiy savdo maydonidir. Birjaning Tokio, Shanxay, London, Frankfurt, Istambul va Singapur fond birjalari bilan yaqin hamkorligi yo‘lga qo‘yilgan. “Toshkent” respublika fond birjasi Yevroosiyo fond birjalari federatsiyasi hamda MDH mamlakatlari birjalari xalqaro uyushmasining a’zosidir.