AQSh prezidenti Baraka Obamaning ammasi Zaytuni Onyango 8-aprelga o‘tar tunda 61 yoshida vafot etdi. U Boston shahridagi qariyalar uyida, uyqusida jon bergan, deb yozadi muassasa xodimi xabariga tayangan holda Reuters.
Zaytuni Onyango prezident otasining tug‘ishgan singlisi edi. U Keniyadan AQShga 2000-yili ko‘chib o‘tgan, 2002-yili esa o‘z vatanidagi siyosiy vaziyat murakkabligi sababli siyosiy boshpana so‘ragan. Uning so‘rovi rad etilsa-da, ayol qochoq maqomini olish uchun harakat qilishda davom etgan. 2010-yilda Bostondagi migrantlar ishi bo‘yicha sudya uning bu boradagi talabini qondirgan. Shu bilan Onyango Qo‘shma Shtatlarda yashash uchun guvohnoma va ishlash uchun ruxsatnomaga ega bo‘lgan.
Qariyalar uyi xodimi Gordon Landefeld so‘zlariga ko‘ra, joriy yilning yanvar oyida ayolning salomatligi yomonlashgan. Obamaning ammasi Giyena-Barre sindromidan aziyat chekkan va qisman falajlangan. Onyango o‘z vatanida yashagan payti dasturchi bo‘lib ishlagan, AQShga ko‘chib o‘tgach esa o‘qituvchilik va huquqiy maslahatchilik qilgan.
Prezident ammasini yaxshi ko‘rgan, o‘z tarjimai holini kitob qilib yozganida uni “Zaytuni ammajonim” deb atagan. Barak Obama o‘z otasini oxirgi marta o‘n yasharligida ko‘rgan, u haqdagi ko‘p ma’lumotlarni esa ammasidan bilib olgan. Shunga qaramay, Oq uy vakillarining guvohlik berishlaricha, Obama o‘z ammasining taqdirini hal etish ishlariga aralashmagan.
Izoh (0)