“VKontakte” ijtimoiy tarmog‘i aksiyalarining 48 foiziga egalik qiluvchi UCP jamg‘armasi Virginiya orollaridagi sudga da’vo arizasi topshirdi. U ijtimoiy tarmoq bosh direktori Pavel Durov va “VKontakte” aksiyalarining 52 foizi sohibi – Mail.ru Group ustidan da’vo qilgan, deb yozadi “ITAR-TASS”.
Ma’lum bo‘lishicha, da’vo predmeti Telegram internet-messenjeridir. “VKontakte”ning bosh direktori bo‘lgani holda Durov uni 2013-yilning yozida shaxsiy loyiha sifatida ishga tushirgan. Pavelning akasi Nikolay Durov ham, rasman “VKontakte” texnik direktori bo‘laturib, Telegram’ni ishlab chiqishda ishtirok etgan, deyiladi UCP xabarida.
Jamg‘armaning fikricha, Durov o‘z xizmat vakolatlaridan foydalangan holda Telegram’ni yaratgan, ammo uni “VKontakte” doirasida ishga tushirish o‘rniga, o‘zi egalik qilgan. UCP shu asosda Telegram’da ijtimoiy tarmoqning huquqi mavjudligi tan olinishini talab qilmoqda.
— “VKontakte”ning aksionerlari va direktorlar kengashi a’zolari sifatida o‘z kompaniyamizning rivojlanishini va iqtisodiy manfaatlarimizning himoyalanishini ko‘zlaymiz. Biz bundan keyin ham Telegram biznesining har qanday qismiga bo‘lgan huquqimizni himoya qilish uchun imkon qadar barcha yuridik choralarni ko‘ramiz. Telegram’dan ulush sotib olmoqchi bo‘lgan har qanday uchinchi tomon kelajakda “VKontakte” tomonidan e’tirozlar bo‘lishi ehtimolini hisobga olishi lozim, – deydi UCP hamkori Yuriy Kachuro.
Ta’kidlash kerakki, UCP jamg‘armasi “VKontakte” aksiyalarining 48 foizini ijtimoiy tarmoqning hamkorlikdagi asoschilari – Vyacheslav Mirilashvili va Lev Leviyevdan 2013-yilning aprelida sotib olgan. Shundan keyin oradan ko‘p vaqt o‘tmay, Telegram messenjeri sababli Durov va UCP o‘rtasida ziddiyat kelib chiqqan. Pavel Durovning shaxsiy loyihalar bilan shug‘ullanishi, shuningdek, messenjerni rivojlantirish uchun “VKontakte” zaxiralaridan foydalanishi (jamg‘armaning fikri shunday) UCP tomoniga yoqmagan.
Izoh (0)