AQShning Nyu-York shtatida joylashgan BMT bosh qarorgohida O‘zbekiston Respublikasida qabul qilingan “Sog‘lom bola yili” Davlat dasturi haqidagi ma’lumot Bosh assambleyaning 68-sessiyasi rasmiy hujjati sifatida tarqatildi, deb xabar bermoqda “Jahon” AA.
UzReport’ning ma’lum qilishicha, hujjatda Prezident Islom Karimovning tashabbusi bilan 2014-yilning O‘zbekiston Respublikasida Sog‘lom bola yili deb nomlanganligi va shunga doir dastur qabul qilinganligi keltirilgan.
Qayd etish joizki, “Sog‘lom bola yili” Davlat dasturi yetti bo‘lim va 125 ta banddan iborat bo‘lib, ularda bolalarning tug‘ilishi, tarbiyalanishi va ta’lim olishi, shuningdek ijtimoiy sohani rivojlantirish uchun ajratiluvchi vositalarning samaradorligini oshirish orqali oilada sog‘lom muhitni, undagi iqtisodiy va ma’naviy-axloqiy asoslarni mustahkamlash bilan bog‘liq barcha masalalar aks etgan.
Shuningdek, dasturda oilada o‘zaro muhabbat va hurmat muhitini, yuksak axloqiy qadriyatlarni shakllantirish, yosh oila oyoqqa turishida moddiy yordam ko‘rsatish, onalik va bolalik muhofazasini ta’minlash, ona va bola salomatligini mustahkamlash, ayollarga o‘zini namoyon qilishi uchun zaruriy sharoitlarni yaratish va kundalik uy mehnatini yengillashtirish kabi birlamchi vazifalar aniqlashtirilgan.
Ta’kidlash joizki, “Sog‘lom bola yili” Davlat dasturi haqidagi ma’lumot BMTning barcha oltita rasmiy tili — ingliz, arab, ispan, xitoy, rus va fransuz tillariga o‘girilgan bo‘lib, elektron ko‘rinishda BMT saytida joylashtirilgan.
Izoh (0)