Ugandaning yovvoyi tabiatni muhofaza qilish bilan shug‘ullanuvchi tashkiloti xodimlari tomonidan vazni ming kilogramm keladigan ulkan timsoh qo‘lga olindi. Jonivor to‘rt nafar baliqchining umriga zomin bo‘lganligi taxmin qilinmoqda, deyiladi SkyNews xabarida.
Qurbonlardan birining qarindoshlari aytishlaricha, suv yuzasida suzib yurgan kiyim parchalari orqaligina uning shu yerda halok bo‘lganligini aniqlashgan. Shuningdek, yana bir qancha hududlarda baliqchilarga hamla qilgan timsoh ham shu ekanligini taxmin qilishmoqda.Timsohni ovlash uchun to‘rt kun vaqt sarflandi. Viktoriya ko‘li sohiliga qarmoqsimon ulkan metall ilgakka go‘sht ildirib qo‘yishdi. Jonivor xo‘rakni yutib, qo‘lga tushgach, uni ko‘pchilik bo‘lib bog‘lab, yuk mashinasiga ortishdi. Endi timsohni Merchison Fols milliy xiyoboniga topshirishadi.
Ekspertlarning fikricha, ulkan timsoh kamida sakson yoshda. Bundan tashqari, uning vazni Filippindagi xiyobonda saqlangan Lolong laqabli timsohdan 47 kilogrammga yengil. Ginnessning rekordlar kitobiga kiritilgan Lolongning uzunligi olti metrdan oshar, og‘irligi esa bir tonnaga yaqin edi. U 50 yoshga ham to‘lmasdan, o‘tgan yili o‘lgan edi.
Izoh (0)