Belorussiya MDH raisligi vazifalarini Ukraina o‘rniga o‘z zimmasiga oldi
Belorussiya Tashqi ishlar vaziri Vladimir Makey Moskvada bo‘lib o‘tgan MDH Tashqi ishlari vazirlari majlisi oldidan Belorussiya MDH raisligi vazifalarini Ukraina o‘rniga o‘z zimmasiga olganligini e’lon qildi. Bu haqda “RIA Novosti” xabar berdi.
“Belorussiya MDH raisligini qabul qilishga tayyorligini bildiramiz. Biz, avvalo, boshlayotgan faoliyatimizda Hamdo‘stlik davlatlari o‘rtasidagi yaxshi qo‘shnichilik munosabatlarini mustahkamlashga e’tibor qaratishimiz lozim. Yana bir muhim vazifalardan biri — MDH yig‘ilishlarini o‘z vaqtida va sifatli tashkil etishdan iborat”, — dedi Makey. Uning ta’kidlashicha, iqtisodiy sohada Belorussiya asosiy e’tiborini 2011-yil 18-oktabrda imzolangan erkin savdo hududi to‘g‘risidagi kelishuv shartlarini bosqichma-bosqich amalga oshirishga qaratadi.
“Iqtisodiy Kengash bilan birgalikda biz xizmatlarning erkin savdosi, davlat ehtiyojlari uchun xarid qilish va eksport bojlarini bosqichma-bosqich bekor qilish kabi jarayonlarni nazoratimizga olamiz”, — dedi Makey o‘z nutqida.
Ukrainada siyosiy inqiroz 2013-yilning noyabr oyi oxirida, ya’ni hukumat yevrointegratsiyani to‘xtatib turishga qaror qilgan paytda boshlangan edi. “Yevromaydon” deya nom olgan ommaviy noroziliklar butun Ukraina hududi bo‘yicha yoyildi hamda yanvar oyiga kelib, huquq-tartibot organlari bilan qurolli to‘qnashuv sodir bo‘lishiga zamin yaratdi.
Muxolifatchilar tomonidan olov purkovchi qurollar va “Molotov kokteyllari”dan foydalanib uyushtirilgan ko‘cha to‘qnashuvlarida yuzlab odamlar qurbon bo‘ldi. 22-fevralda hukumatda davlat to‘ntarishi uyushtirildi. Prezident Yanukovich hamda muxolif yetakchilari o‘rtasidagi kelishuvga amal qilmagan Oliy Rada konstitutsiyani o‘zgartirdi, parlament va Tashqi ishlar vazirligi tarkibini almashtirdi, shuningdek, davlat rahbarini lavozimidan chetlatdi. Bu esa yakunda prezidentning o‘z hayotini o‘ylab mamlakatdan qochib ketishiga olib keldi. 27-fevral kuni Ukraina parlamenti “xalq ishonchi hukumati”ni tashkil qildi. Eslatib o‘tamiz, ushbu hukumat rahbari lavozimiga Arseniy Yatsenyuk tayinlangan edi.
