Toshkentda Koreya rassomlarining ko‘rgazmasi ochildi (foto)
O‘zbekiston Badiiy akademiyasining Ikuo Xirayama xalqaro madaniyat karvonsaroyida Koreya Respublikasi rassomlarining ko‘rgazmasi ochildi, deb yozadi O‘zA.
O‘zbekiston Badiiy akademiyasi va Koreya tasviriy san’at uyushmasi hamkorligida tashkil etilgan mazkur ko‘rgazmaning ochilishida turli vazirlik va idoralar, ijodiy tashkilotlar, mamlakatimizda faoliyat ko‘rsatayotgan diplomatik korpus vakillari, rassomlar, san’at ixlosmandlari ishtirok etdi.
Ko‘rgazmada koreyalik musavvirlar hamda O‘zbekistonda yashab, ijod qilayotgan koreys millatiga mansub rassomlarning 300 dan ortiq asari namoyish etilmoqda.
– O‘zbekiston va Janubiy Koreya rassomlari ijodida mushtarak jihatlar ko‘p, – dedi Koreya tasviriy san’at uyushmasi raisi Cho Kan Xun. – Ularda milliy va umuminsoniy g‘oyalar, ezgu tuyg‘ular tarannum etiladi. Ushbu ko‘rgazma koreys va o‘zbek xalqlarining do‘stlik rishtalarini yanada mustahkamlash, mamlakatlarimiz o‘rtasidagi madaniy aloqalarni rivojlantirishga katta hissa qo‘shadi.
Ko‘rgazmadan o‘rin olgan asarlar, yorqin ranglarda aks ettirilgan turfa kompozitsiyalar san’at ixlosmandlarida katta taassurot qoldirmoqda.
