Belorussiyada denominatsiyadan keyin chiqariladigan pullar tashqi ko‘rinishi jihatidan yevro kupyurasiga o‘xshash bo‘ladi. Buni respublika prezidenti Aleksandr Lukashenko ma’lum qilmoqda, deb yozadi “Interfaks-Zapad” nashri.
“Bilaman, siz yangi chiroyli valyuta talab qilasiz, chunki millionlarni hamyonda olib yurish og‘ir. Vaqti kelib, biz shunday qilamiz”, – dedi prezident, Baranovichi shahridagi 558-aviata’mir zavodida chiqish qilganida.
Lukashenkoning ta’kidlashicha, yangi kupyuralar allaqachon zarb etilgan va omborxonalarda saqlanmoqda. Denominatsiya haqida bir necha yildan buyon gapirilib kelayotgan bo‘lsa-da, Lukashenko hali buning “vaqti kelmaganligi”ni aytdi. “Buning uchun iqtisodiyot ishlay boshlashi kerak, muayyan barqarorlik bo‘lishi lozim”, – deya so‘ziga aniqlik kiritdi davlat rahbari.
Avvalroq Lukashenko denominatsiyani o‘tkazish vaqti haqida undan yarim yil avval xabardor qilishga va’da bergan. Milliy bank boshqaruvi raisi Nadejda Yermakova esa, inflyatsiya o‘sishining yuqori ekanligi sababli buni 2014-yilda amalga oshirish mushkul ekanligini aytgan.
Agarda denominatsiya amalga oshirilsa, u Belorussiya tarixida uchinchisi bo‘ladi. Mamldakatda 1994-yilning 20-avgustida va 2000-yilning 1-yanvarida ham denominatsiya o‘tkazilgan.
Izoh (0)