Qozog‘iston Parlamenti O‘zbekiston bilan strategik hamkorlik haqidagi shartnoma ratifikatsiyasi haqidagi qonun loyihasini tasdiqladi

Bugun, 2-aprel kuni palata spikeri Nurlan Nigmatulin raisligi ostida bo‘lib o‘tgan yig‘ilishda Qozog‘iston Parlamenti Majlisi tomonidan “Qozog‘iston Respublikasi va O‘zbekiston Respublikasi o‘rtasidagi strategik hamkorlik bo‘yicha Bitim ratifikatsiyasi haqida”gi qonun loyihasi ma’qullandi. Bu haqda Qozog‘iston Parlamenti Majlisining matbuot xizmati xabar berdi.

Shartnomaga ko‘ra, tomonlar ularning mustaqilligi, suvereniteti, hududiy yaxlitligiga bo‘lgan xavflarni bartaraf etishda o‘zaro yordam ko‘rsatadi, deya qayd etdi Qozog‘iston Majlisining Xalqaro ishlar, mudofaa va xavfsizlik bo‘yicha qo‘mitasi raisi Maulen Ashimbayev yalpi majlisda.

Ushbu hujjat Qozog‘iston Respublikasi Prezidenti Nursulton Nazarboyevning O‘zbekiston Respublikasiga 2013-yil 13—14-iyun kunlari rasmiy tashrifi davomida Toshkent shahrida imzolangan edi.