O‘zbekiston Respublikasi Oliy Majlisi Qonunchilik palatasining ish rejasiga muvofiq, Ekologiya va atrof muhitni muhofaza qilish masalalari qo‘mitasi va O‘zbekiston Ekologik harakati deputatlar guruhi tomonidan “Toshkent shahrida va Toshkent viloyatida ‘Suv va suvdan foydalanish to‘g‘risida’gi Qonunning 74-moddasi (Suv obyektlariga oqindi suvlarni oqizishga yo‘l qo‘yish shartlari) ijro etilishi holatini nazorat-tahlil faoliyati tartibida o‘rganish natijalari haqida”gi qo‘shma qaror ijrosiga bag‘ishlangan yig‘ilish o‘tkazildi. Bu haqda palata matbuot xizmati xabar berdi.
O‘zbekiston Respublikasining “Suv va suvdan foydalanish to‘g‘risida”gi Qonunining 74-moddasida tabiatni muhofaza qilish va sanitariya nazorati organlari tomonidan oqindi suvlarni oqizishni cheklab, to‘xtatib yoki taqiqlab qo‘yish, suv obyektlariga oqindi suvlarni oqizishda suv obyekti tarkibidagi ifloslovchi moddalarning belgilab qo‘yilgan me’yorlardan oshib ketgan hollarda, va bunda suv iste’molchisi bunday oqindi suvlarni tabiatni muhofaza qilish va sanitariya nazorati organlari tomonidan belgilab qo‘yilgan darajaga yetkazib tozalab berishni ta’minlamagan hollarda ayrim sanoat qurilmalarini, sexlar, korxonalar, tashkilotlar, muassasalarning faoliyati to‘xtatib qo‘yish kabi qoidalar ko‘zda tutilgan.
2013-yilning mart oyida nazorat-tahlil faoliyati doirasida ishchi guruhi tomonidan Toshkent shahri va Toshkent viloyatining ayrim xo‘jalik yurituvchi subyektlariga borib, ushbu moddaning ijro etilishi holati o‘rganib chiqildi. “Salor” va “Bo‘zsuv” aeratsiya stansiyalari, Bektemir tozalash inshootlari, Chirchiq “Suvoqava” ShIK 1-havzasining tozalash inshootlari shular jumlasidan. Ayni paytda Toshkent shahri va Toshkent viloyati hokimliklari, Tabiatni muhofaza qilish qo‘mitasi, Sog‘liqni saqlash vazirligi, “O‘zkommunxizmat” agentligi, “Suvsoz” DUK, Toshkent viloyati “Suvoqava” OAJ tomonidan taqdim qilingan axborot o‘rganib chiqildi.
Yig‘ilishda qayd etilganidek, bir yil avval aniqlangan kamchiliklar o‘zining dolzarbligini yo‘qotgani yo‘q. Kommunal xo‘jalik tizimida, shuningdek alohida xo‘jalik yurituvchi subyektlar tomonidan avvalgidek ma’naviy eskirgan tozalash texnologiyalari va uskunalaridan foydalanilmoqda, ular esa oqindi suvlarni belgilangan me’yorgacha tozalash bo‘yicha texnologik jarayonlarga rioya qilish imkonini bermaydi, natijada oqindi suvlarni suv obyektlariga oqizishning belgilangan shartlarini bajarish qiyin kechmoqda. Kommunal xo‘jalik tizimi bo‘ylab tozalash inshootlariga kelib tushadigan oqindi suvlar o‘simlik va hayvonotga oid qoldiqlar, boshlang‘ich materiallarga ishlov berish paytida hosil bo‘luvchi eruvchan va erimaydigan organik va mineral moddalar bilan ifloslanishi darajasi yuqori. Oqibat natijada bu oqindi suvlar tozalanishining yanada yomonlashuviga hamda Toshkent shahri va Toshkent viloyati kommunal sektorida foydalanilayotgan tozalash inshootlari va aeratsiya stansiyalari faoliyati samaradorligining pasayishiga olib keladi.
Ayni paytda yig‘ilish ishtirokchilari nafaqat kommunal xo‘jalik tizimidagi tozalash inshootlaridan, shuningdek kanalizatsiya tarmoqlariga ulanmagan alohida sanoat qurilmalari, korxonalar, tashkilotlar tomonidan suv ob’ektlariga oqindi suvlar chiqarilishiga yo‘l qo‘yish shartlariga rioya qilinishini ta’minlash bo‘yicha zarur chora-tadbirlar qabul qilish zarurligiga to‘xtatilib o‘tishdi. Ushbu sohadagi iqtisodiy mexanizm va qonunchilikni takomillashtirish bo‘yicha takliflar muhokama qilindi.
Muhokama yakunida O‘zbekiston Respublikasi “Suv va suvdan foydalanish to‘g‘risida”gi Qonuni 74-moddasining joylardagi ijrosini kuchaytirish bo‘yicha tavsiyalar berildi, kelgusi vazifalarni qamrab oluvchi tegishli qaror qabul qilindi.
Izoh (0)