Ҳозирда DreamWorks “Шрек”нинг бешинчи қисми устида ишламоқда. Мухлисларнинг қизиқиши турлича бўлса-да, фильм катта касса йиғиши кутилмоқда. Қуйида эса студиянинг йиллар ўтса ҳам ўз қадрини йўқотмайдиган бешта машҳур мультфильм франшизасини санаб ўтамиз.
“Mустанг” (2002)
Mустанг ҳақидаги мультфильм DreamWorks тўлиқ 3D анимацияга ўтишидан олдин яратилган. Шу сабабли унинг анимация услуби студиянинг кейинги фильмларидан анча фарқ қилади.
Мультфильмнинг яна бир ўзига хос жиҳати — ҳайвонлар ҳақидаги кўплаб фильмлардан фарқли равишда, ундаги отлар гапирмайди. Шунга қарамай, “Mустанг” бугунги кунгача машҳурлигини йўқотмаган. Картинани бастакор Ҳанс Зиммер яратган мусиқалар янада таъсирчан қилган.
“Миср шаҳзодаси” (1998)
Замонавий лойиҳалар билан солиштирганда айрим камчиликлари бўлишига қарамай, “Миср шаҳзодаси” DreamWorks тарихидаги энг яхши лойиҳалардан бири ҳисобланади. Унда Инжилдаги воқеа экранлаштирилиб, диний мавзуларга қизиқмайдиган томошабинлар учун ҳам жозибали тарзда тақдим этилган.
Қизиқарли сюжет, сифатли анимация, машҳур актёрларнинг овоз бериши ва пухта ишланган қаҳрамонлар бу мультфильмни катталар ҳам, болалар ҳам севиб томоша қиладиган картинага айлантирган.
“Мадагаскар” (2005)
Сўнгги йилларда франшиза ҳақида камроқ эшитилаётган бўлса-да, “Мадагаскар” узоқ вақт давомида бир нечта давоми ва спин-оффлари орқали машҳурлигини сақлаб қолди.
Биринчи фильм томошабинлар севиб қолган кўплаб қаҳрамонларни тақдим этди. Бош қаҳрамонларга комедия оламининг машҳур вакиллари овоз бергани эса франшизанинг муваффақиятига катта ҳисса қўшди. Шу сабабли ундаги кўплаб ҳазиллар ҳали узоқ вақт ёдда қолиши аниқ.
“Кунг-фу панда” (2008)
Ушбу франшиза DreamWorks’нинг ижодий ёндашувини яққол намоён этди. Студия жанг санъати мавзусини ўз йўлини излаётган ёлғиз қаҳрамон ҳикояси билан бирлаштирди.
Кейинчалик “Кунг-фу панда”нинг яна учта давоми чиқди. Ҳар бир фильмда кунг-фу устаси бўлган панда По янги ёвуз қаҳрамонга қарши курашади ва бу жараён унинг ўзини, мақсади ҳамда ҳаётдаги ўрнини англашига ёрдам беради.
Биринчи қисм ҳануз мухлисларнинг севимлиси бўлса-да, кейинги фильмлар ҳам томошабинлар томонидан яхши кутиб олинган.
“Аждаҳо ўргатувчилар” (2010)
“Шрек”дан фарқли равишда, “Аждарҳони қандай ўргатиш керак” франшизасининг учала асосий фильми ҳам танқидчилар ва томошабинлар томонидан юқори баҳоланган.
Бу йил биринчи қисмнинг ремейки ҳам экранларга чиқди, унинг давоми эса ишлаб чиқаришга топширилган. Бунинг асосий сабаби — оригинал ҳикоя йиллар ўтса ҳам янги мухлисларни ўзига жалб қилаётгани ва ўзининг ажойиб визуал олами билан томошабинларни ҳайратда қолдираётганидир.
