Агар паролингизни унутиб қўйсангиз ёки одатий аутентификация воситаларидан фойдаланиш имкониятини йўқотсангиз, Google шахсингизни тасдиқлаш ва аккаунтингизга киришнинг янги усулини жорий қилди. Энди бунинг учун юзингиз акс этган қисқа видеони ёзиб олишингиз мумкин — тизим уни аввалроқ сақланган видео билан солиштиради.
Функцияни созлаш учун смартфон ёки компьютер камерасига қараб, экрандаги кўрсатмаларга мувофиқ бошингиз билан бир нечта оддий ҳаракатларни бажаришингиз керак бўлади. Шунда Google юзингиз тасвирини турли ракурслардан олади. Бу жараён Apple қурилмаларидаги Face ID’ни созлашга ўхшайди, лекин инфрақизил датчикларни талаб этмайди.
Эталон видеоселфи Google’нинг булутли хотирасида шифрланган ҳолда сақланади. Шу туфайли шахсни тасдиқлаш муайян бир қурилмага боғлаб қўйилмайди. Сақланган ёзувни исталган вақтда аккаунт созламалари орқали ўчириб юбориш мумкин.
Сукут бўйича ролик фақат ҳисобга кириш учун ишлатилади. Агар хоҳласа, фойдаланувчи Google’га ундан қўшимча мақсадларда фойдаланишга ҳам рухсат бериши мумкин — тўғри, компания айнан қандай мақсадлар эканлигига аниқлик киритмаяпти.
Google тизимни суратлар ва дипфейклар ёрдамида алдашга уринишлардан бир неча босқичли ҳимоядан фойдаланишини таъкидламоқда. Бундан ташқари, компаниянинг шубҳали кириш уринишларини аниқлайдиган стандарт механизмлари ҳам ўз фаолиятини давом эттиради.
Бу функция бутун дунё бўйлаб босқичма-босқич тарқатилмоқда, шу сабабли ҳозирча ҳаммада мавжуд эмас. Унинг сизда пайдо бўлганини текшириш ва дарҳол созлаб олиш учун махсус саҳифага ўтишингиз мумкин.
