Россия дрони тунда Руминия ҳаво ҳудудига бузиб кирди. Бу ҳақда Руминия Мудофаа вазирлигига таяниб, Reuters хабар берди.

Маълум қилинишича, дрон ҳаво ҳудудига Украинага тунги ҳужумлар вақти кириб келган. У билан алоқа чегарадаги Килия-Веке қишлоғининг жануби-шарқида узилган. Европа Иттифоқи ва НАТО аъзоси бўлган Руминия Украина билан 650 километр узунликдаги қуруқлик чегарасига эга.

Россия Дунай дарёси орқали Украина портларига ҳужум қила бошлаганидан бери дронлар бир неча бор Руминия ҳаво ҳудудига бузиб кирди. Украина Қуролли кучларига кўра, Россия 16 апрель куни соат 18:00 дан бошлаб битта баллистик ракета ва 172 та дрон учирган. Ҳаво ҳужумидан мудофаа бўлинмалари 147 та дронни уриб туширган ёки зарарсизлантирган. Бироқ ракета ва 20 та дрон саккизта ҳудудга зарба берган.

2025 йилда Европа ҳаво ҳудудида рус дронлари сони кўпайди

Ўтган йили Дания ва Норвегия аэропортлари яқинида ҳам номаълум дронлар парвози қайд этилди. Бу эса Европа етакчилари ўртасида Россия таҳдидидан ҳимояланиш учун шарқий чегарада “дрон тўсиғи” яратиш бўйича мунозараларни кучайтирди.

Энг жиддий ҳодисалардан бири 10 сентябрга ўтар кечаси юз берди — Россиянинг 20 га яқин дрони Польша ҳаво ҳудудига кирди. Ўшанда Украинага йирик зарба берилаётган пайтда камида 19 та дрон Польша чегарасини кесиб ўтган. Уларни аниқлаш ва назоратга олиш учун илк бор НАТО қирувчи самолётлари жалб этилган. Кейинчалик Польша ҳудудидан 17 та дрон қолдиғи топилган.

Украина президенти Владимир Зеленский Россия бу ҳаракатлар орқали Европа осмони ҳимояси қанчалик самарали эканини атайлаб синаб кўраётганини айтган. Россия қирувчи самолётлари Эстония, дронлари эса Бельгия ҳаво ҳудудига ҳам бузиб киргани қайд этилган.