Индонезиянинг Ғарбий Калимантан провинциясида вертолёт қулаб тушиши оқибатида саккиз киши ҳалок бўлди. Бу ҳақда Reuters хабар берди.

Маълум қилинишича, Airbus H130 вертолёти 16 апрель куни эрталаб радарлардан ғойиб бўлган. У билан алоқа вертолёт Мелавидаги плантация ҳудудидан ҳавога кўтарилганидан беш дақиқа ўтиб узилган.

“Ҳалокат юз берган ёки алоқа йўқолган ҳудуд тик тепаликлар билан қопланган зич ўрмонзор ҳисобланади”, деди Индонезия қутқарув агентлиги раҳбари Муҳаммад Сяфий.

У қутқарувчилар алоқа узилган жойдан тахминан 3 километр ғарбда вертолётнинг, эҳтимол, дум қисми топилганини маълум қилди. Ҳалокат сабаби ҳозирча номаълум. Бортдаги олти нафар йўловчи ва икки нафар экипаж аъзоси омон қолмаган.


Қутқарувчилар, жумладан, ҳарбийлар ва полиция ходимлари қуруқликдаги йўллар орқали ҳалокат жойига етиб боришга ҳаракат қилмоқда. Вертолёт Matthew Air Nusantara компаниясига тегишли бўлган.

Маълумот ўрнида, апрель ойи бошида Бразилияда кичик моторли самолёт ресторанга қулаб тушган эди. Ўшанда юз берган кучли портлаш оқибатида тўрт киши ҳалок бўлган. Бахтли тасодиф туфайли, ўша вақтда ресторан ёпиқ бўлган, акс ҳолда қурбонлар сони ортиши мумкин эди.