Аргентина футбол ассоциацияси (АФА) АҚШнинг Маями шаҳрида жойлашган VID промоутерлик компанияси томонидан ташкилот ва футболчи Лионель Мессига нисбатан берилган кўп миллионли даъвони асоссиз деб атади. Бу ҳақда TMZ Sports хабар бермоқда.

VID компанияси 2025 йил октябрь ойида АҚШда ўтказилган иккита кўргазмали ўйин учун АФАга 7 миллион доллар тўлаганини даъво қилмоқда. Шартномага кўра, Месси агар жароҳати бўлмаса, ҳар бир ўйинда камида 30 дақиқа майдонда ҳаракат қилиши шарт бўлган. Бироқ, футболчи Венесуэлага қарши баҳсда жисмонан соғлом бўлишига қарамай, майдонга тушмаган. Бунинг натижасида компания катта миқдорда зарар кўрганини билдириб, судга мурожаат қилган.
Ассоциация вакили барча мажбуриятлар тўлиқ бажарилганини ва компаниянинг ўзи АФАъдан қарздор эканини таъкидлади:

“АФА ВИД компанияси томонидан топширилган даъво аризасидан хабардор. Ташкилотимиз тегишли келишувлар бўйича барча мажбуриятларини, жумладан, 2025 йил октябрь ойидаги иккала ўйинда ҳам миллий терма жамоанинг иштирокини тўлиқ таъминлаган. Буни исботловчи шартномалар, тўлов ҳужжатлари ва ёзишмалар судда тақдим этилиши мумкин. АФА ўз манфаатларини фаол ҳимоя қилади ва даъвогарлардан ташкилотга тўланиши лозим бўлган миллионлаб долларларни ундиришни талаб қилади”, дейилади баёнотда.

Эслатиб ўтамиз, Аргентина терма жамоаси ўша вақтда АҚШда Венесуэла (1:0) ва Пуэрто-Рико (6:0) жамоаларига қарши баҳс олиб борган эди. Ҳозирда суд жараёнлари давом этиши кутилмоқда.