Кубада давом этаётган энергетик инқироз ва АҚШ томонидан ўрнатилган нефть блокадаси мамлакат соғлиқни сақлаш тизимини ҳалокат ёқасига келтириб қўйди. Маҳаллий шифокорларнинг таъкидлашича, шифохоналардаги оғир шароитлар туфайли олдини олиш мумкин бўлган ўлим ҳолатлари сони кескин ортмоқда. Бу ҳақда The New York Times хабар берди.

Гаванада яшовчи 21 ёшли Хорхе Перес Алварес каби беморлар учун ҳар бир дақиқа ғанимат. У генетик хасталик туфайли ўпка вентиляцияси қурилмасига боғланиб қолган.

“Боламнинг ҳаёти электрга боғлиқ”, дейди унинг онаси.

Мамлакатда ҳар куни юз бераётган кўп соатлик узилишлар сабабли одамлар қурилма аккумуляторларини қувватлантиришга улгурмаяпти. Бир пайтлар камбағал давлатлар учун намуна ҳисобланган Куба тиббиёти бугун қуйидаги муаммолар билан курашмоқда:

Операцияларнинг тўхтатилиши. Ёнилғи йўқлиги сабабли тез ёрдам машиналари тўхтаб қолган, шифокорлар ишга етиб кела олмаяпти. Ҳозирда 96 400 нафар бемор жарроҳлик амалиётини кутмоқда.
Болалар ўлими. 2018 йилда ҳар минг чақалоққа 4 та ўлим тўғри келган бўлса (АҚШдан яхшироқ кўрсаткич), 2025 йилга келиб бу кўрсаткич 10 тага етди.
Дори-дармон тақчиллиги. Заводлар дизель йўқлиги сабабли дори ишлаб чиқаришни тўхтатган. 30 мингдан ортиқ бола вакцина ололмаган, 20 мингга яқин бемор кимётерапия ва диализ муолажаларини ўз вақтида ололмаяпти.
Жон Ҳопкинс университети эксперти Пол Шпигел Кубадаги вазиятни Афғонистон, Украина ва Ғазодаги инқирозли ҳолатларга қиёслади. Унинг сўзларига кўра, шифокорлар кимни қутқариш борасида танлов қилишга мажбур бўлмоқда.
Гаванадаги йирик педиатрия шифохонаси анестезиологи Алиот Фернандеснинг айтишича, электр ўчганида генераторлар ишга тушгунча ҳамширалар чақалоқларнинг ўпкасига қўлда ҳаво ҳайдашга мажбур бўлмоқда.
Куба иқтисодиёти чуқур рецессияни бошдан кечирмоқда. Давлат ишчисининг ўртача ойлиги 13 долларга тушиб қолган. Дональд Трамп даврида бошланган ва ҳозирда кучайтирилган санкциялар туфайли Куба халқаро тўловларни амалга ошира олмаяпти, Европа ва АҚШ дори етказиб берувчилари эса шартномаларни бекор қилган.
Ҳукумат мактаб ва шифохоналарга қуёш панеллари ўрнатиш орқали вазиятдан чиқишга уринмоқда, бироқ ёнилғи танқислиги сув насосларининг тўхташига ва озиқ-овқат нархининг кескин ошишига олиб келган. Кубага сўнгги нефть партияси 9 январда келган. Эндиликда барча умидлар келаси ҳафта етиб келиши кутилаётган Россия танкеридан бўлиб турибди.