АҚШ етказиб берувчилари 2026 йил бошидан буён Кубанинг хусусий секторига қарийб 30 минг баррел ёнилғи жўнатди. Бу ҳақда тегишли ҳужжатлар ва кема қатнови маълумотларига асосланиб Reuters хабар берди.


Мазкур қадам Дональд Трамп маъмуриятининг давлат корхоналарига нисбатан хусусий бизнесга устунлик бериш режасидан далолат бермоқда.
Блокада ичидаги истисно
Жорий 2026 йилнинг январь ойидан бошлаб АҚШ ўзининг азалий рақиби бўлган Кубага нисбатан амалда нефть блокадасини жорий этган эди. Бундан кўзланган мақсад — оролни ёнилғидан маҳрум қилиш орқали Куба ҳукуматини таслим бўлишга мажбурлашдир. Бироқ Вашингтон коммунистик давлатнинг кичик, аммо муҳим хусусий сектори учун истисно қилди.
АҚШ давлат котиби Марко Рубионинг таъкидлашича, ушбу экспортга рухсат берилиши Трамп маъмуриятининг кенгроқ стратегиясига мос келади.
“Ушбу сиёсат ҳукуматга ёки ҳарбийларга алоқадор бўлмаган хусусий сектор ва оддий кубаликларга ёрдам бериш учун ишлаб чиқилган”, деди Рубио.

Февраль ойи бошидан буён хусусий сектор томонидан импорт қилинган ёнилғи ҳажми — тахминан 30 минг баррел (4,8 миллион литр)ни ташкил этади. Бу ўртача ҳажмдаги битта ёнилғи танкерининг ўндан бир қисмига тенг бўлиб, мамлакат эҳтиёжларининг жуда кичик қисмини қоплайди.
Куба яқин вақтгача электр станциялари, автомобиллар ва самолётлар эҳтиёжи учун кунига 100 минг баррел импорт ёнилғисига муҳтож эди. Шунга қарамай, Reuters манбалари импорт ҳажми ҳафтадан-ҳафтага ўсиб бораётганини қайд этди.
Январь ойида Венесуэла президенти Николас Мадуро АҚШ томонидан қўлга олингач, Вашингтон Куба ҳукуматига Венесуэла нефтини етказиб беришни тўсиб қўйди ва бошқа етказиб берувчиларга божлар билан таҳдид қилди.
Куба президенти Мигел Диас-Канел ўтган ҳафтада оролга уч ойдан бери ёнилғи келмаётганини айтди, бироқ хусусий секторга етказилаётган юклар ҳақида тўхталмади.
Маълум бўлишича, 2026 йил бошидан буён 61 та контейнер кемаси хусусий компаниялар учун турли маҳсулотларни (жумладан, ёнилғини) Кубага етказиб берган. Кемалар асосан Гавана ғарбидаги Мариэл портига юк туширмоқда. Юклар асосан АҚШ (айниқса Флорида ва Луизианадаги Саутуэст Пасс коридори), Европа ва Кариб ҳавзаси портларидан келмоқда.
Ушбу янги оқимлар жамоат транспорти, электр энергияси ишлаб чиқариш ва туризм каби давлат назоратидаги соҳалар оғир блокада туфайли фалажланган бир пайтда, хусусий бизнесларга ўз фаолиятини сақлаб қолишга имкон бермоқда. Февраль ойидан бошлаб ёнилғи хусусий компанияларга оз-оздан етиб бора бошлаган, бу эса блокада туфайли тўхтаб қолган бизнесларни жонлантирди.
Мазкур нефть блокадаси фонида кубалик 56 ёшли механик ўзининг 1980 йилда ишлаб чиқарилган Fiat Polski автомобил ини бензин ўрнига кўмирда ҳаракатланадиган қилиб қайта жиҳозлади. Бу АҚШнинг иқтисодий санкциялари туфайли юзага келган ўткир ёнилғи танқислигига қарши ўзига хос ечим бўлди.