Жорий йилдан бошлаб Туркманистон ўқувчилари ўтиш имтиҳонларини топширмайди. Бундай қарор 12 йиллик ўрта таълим концепциясидан келиб чиққан ҳолда қабул қилинди. Бу ҳақда Turkmen.news хабар бермоқда.
Маълум қилинишича, имтиҳонларнинг бекор қилиниши ўқитувчилар, ота-оналар ва ўқувчиларнинг ўзлари томонидан мамнуният билан кутиб олинган.
Шу пайтгача туркман умумтаълим мактаблари ўқувчилари тўртинчи синфдан бошлаб имтиҳон топширар эдилар: бешинчи синфга ўтишда, сўнг олтинчи синфга ва ҳоказо, ўнинчи синфгача давом этарди. 11-синфда битирув имтиҳонлари ўтказилади. Ҳар йили инглиз тили ва информатика фанларидан имтиҳон топширилган. 12 йиллик таълимга ўтиш бутун тизим концепциясини қайта кўриб чиқишни тақозо этди ва шу ўқув йилидан бошлаб синфдан синфга ўтишда имтиҳонлар ўтказмасликка қарор қилинган.
Туркманистонда мактаб таълими уч босқичга бўлинади: 1-босқич — 1—4-синфлар бошланғич таълим; 2-босқич — 5—10-синфлар ўрта таълим; 3-босқич — 11—12-синфлар юқори таълим.
Бундан буён фақат 5-синфга (математика ва туркман тили) ва 10-синфга (география ва ҳаёт фаолияти асослари) ўтишда имтиҳонлар сақланиб қолади. 12-синфда битирувчилар давлат имтиҳонларини топширадилар.
