“Фенербаҳче” бош мураббийи Жозе Моуриньо жамоасининг Европа Лигаси умумий босқичидаги иштироки ҳақида фикр билдирди.
“Бошланишиданоқ ҳамма нарса бизга қарши эди. Турнирнинг янги формати мураккаб бўлди. Қуръа ҳам ноқулай тушди. Ферди сўнгги лаҳзада сафдан чиққанидан кейин биз ўрнига бошқа футболчини қўшишга улгурмадик. Янги футболчиларни рўйхатга киритишга ҳам вақт етмади. Рўйхатга киритилган футболчилар жароҳатланди, киритилмаганлари эса яхши формада эди. Баъзи футболчилар дисквалификация қилинди. Мерт Мюлдюр ўйиндан ташқари ҳолатда жароҳат олди. Амрабат ва Осайи сариқ карточкалар лимити сабабли ўйинни ўтказиб юборди.
Натижада биз бор-йўғи 13 футболчи билан келдик, лекин майдонга тушганларнинг барчаси ажойиб иш қилди. Мен улар билан жуда фахрланаман. Айтдим ва яна такрорлайман: мухлислар ҳам жамоа билан фахрланиши керак” деди Моуриньо клубнинг расмий сайти орқали.
Маълумот учун, “Фенербаҳче” умумий гуруҳ босқичи якунда 24-ўринни эгаллади ва Европа Лигаси плей-офф босқичида иштирок этади. Туркия клубининг рақиби бугун, 31 январь куни бўлиб ўтадиган қуръадан сўнг маълум бўлади.
