“Ливерпуль” ҳужумчиси Муҳаммад Салоҳ АПЛнинг 18-турида “Лестер” устидан ўз уйидаги ғалабадан сўнг “мерсисайдликлар”нинг жорий мавсумдаги эҳтимолий чемпионлиги ҳақидаги саволга жавоб берди.
“Бу алоҳида нарса. Умид қиламанки, биз бу клуб учун Премьер Лигада ғалаба қозонамиз — бу менинг орзум. Умид қиламанки, бу амалга ошади”, дея Салоҳнинг сўзларини келтиради “Ливерпуль” расмий сайти.
Қуюқ туман остида ўтказилган учрашувда ҳисобни “тулкилар” очди. Биринчи таймнинг сўнгги дақиқаларида Гакпо ҳисобни тенглаштирди. Иккинчи бўлимни ҳужумкор ўтказган мезбонлар якунда Жонс ва Салоҳнинг голлари эвазига 3:1 ҳисобида ғалаба қозонди.
“Лестер” устидан эришилган ғалабадан сўнг, “Ливерпуль” 17 ўйиндан 42 очко тўплади ва АПЛ чемпионлиги пойгасида “Челси”дан 7 очколик фарқ билан пешқадамлик қилмоқда. Улар захирасида бир учрашув ҳам бор. Йўқотилган очколар бўйича “қизиллар”нинг энг яқин таъқибчиси “Арсенал” бўлиб турибди. Лондон клуби 17 ўйиндан кейин 33 очко билан турнир жадвалида тўртинчи ўринни эгаллаб турибди. “Ноттингем Форест” 18 турдан кейин 34 очко билан учинчи ўринда бормоқда.
Аввалроқ Салоҳ ва клуб ўртасидаги шартнома узайтириш борасида музокалар олиб борилаётгани хабар қилинганди.
