Қиш кунларида автомобилингиз билан йўлда қолиб кетмаслик учун зарур бўлган қуйидаги керакли буюмларни ўзингиз билан олиб юринг.
Қулф музларини эритувчи ва силикон мойи
Мутахассисларнинг тажрибасига кўра, ҳайдовчи дуч келадиган биринчи муаммо — бу музлаган қулфлар ва эшиклар бўлиши мумкин. Эшикларнинг резина зичлагичларига вақти-вақти билан таркибида силикон бўлган мой суртиб туриш керак, шунда улар музлаб қолмайди. Қотиб қолган қулфлар учун эса махсус восита — музни эритувчи спрей ёрдам беради. Унинг таркибидаги спирт ва силикон туфайли муз тезда эрийди. Айтганча, зичлагичлар ва қулфларга совуқ тушмасдан олдин ҳам ишлов бериш мумкин, бу ҳолда муаммоларнинг олдини олиш осон бўлади.
Чўтка, қирғич ва белкурак
Автомобиль эшиги очилгач, автомобиль устини қордан тозалаш учун чўтка ва музни қириш учун қирғич керак бўлади. Ишни тезлаштириш учун ойналарни эритувчи восита ёрдам беради.
Шунингдек, белкурак олиб юриш мақсадга мувофиқ — шунда қорни тозалаш анча кам вақт ва куч талаб қилади. Албатта, катта курак тезроқ ёрдам беради, аммо буклама кичик варианти ҳам иш беради.
Ўт олдириш симлари ёки автоном ишга тушириш қурилмаси
Энди автомобиль моторини ишга тушириш қолди. Совуқдан қуввати тугаган аккумуляторни бошқа машина ёрдамида ўт олдириш мумкин, бунда ҳайдовчига юқори кучланишли симлар керак бўлади.
Агар пухта тайёргарлик кўрилса, бошқаларнинг ёрдамисиз ўт олдириш вариантини танлаган маъқул. Бунинг учун сизда автоном ишга тушириш қурилмаси бўлиши лозим. Сиғими 14 000 мА/соат бўлган бундай гаджет учтагача аккумуляторни ўт олдира олади.
Кимёвий иситкичлар, пауэрбанклар ва фонар
Узоқ сафарларда, айниқса кечаси йўлда қолиб кетиш эҳтимоли бўлганда автоном энергия, иссиқлик ва ёруғлик манбаларини олиб юриш керак. Агар мотор бирор сабабга кўра ўчиб қолса, смартфонингиз қуввати тугаб қолмаслиги учун пауэрбанк асқатоди. Фонар эса ёруғлик билан таъминлайди, совиб бораётган автомобилда эса исиниш учун кимёвий иситкичлар тўплами ёрдам беради.
Сув ўтказмайдиган қўлқоплар ва ёпинчиқ
Бундай нарсаларга кўпчилик эътибор бермайди. Ойналарни қордан тозалаш, ғилдиракни алмаштириш, моторни текшириш ёки машинани чуқурдан чиқаришда ўзингизни совуқ ва лойдан ҳимоя қилсангиз, иш осонроқ кечади. Бундай пайтда иссиқ резинали қўлқоплар ва захира нимча ёки куртка жуда асқотиши мумкин. Айниқса, доим машинада юриб, қишки кийим киймайдиганлар учун бу жуда муҳим.
