Германия Бундеслигасининг 11-туридан ўрин олган “Бавария” ва “Аугсбург” учрашуви якунланди. Ўйин Мюнхеннинг “Арена” стадионида бўлиб ўтди. Учрашувнинг бош ҳаками сифатида Даниэль Шлагер ишлади. Учрашув 3:0 ҳисобида мезбонлар фойдасига ҳал бўлди.
“Бавария”нинг англиялик футболчиси Ҳарри Кейн хет-трик қайд этди. Ҳозирда футболчи Бундеслигада 50 та голга эга бўлиб, унга бу натижа учун 43 та ўйин керак бўлди. Шу тариқа Кейн норвегиялик Эрлинг Ҳоланднинг 50 та голни уриш тезлиги бўйича рекордини бузиб, Бундеслиганинг янги рекордини ўрнатди. Дортмунднинг “Боруссия”си таркибида футболчи бу кўрсаткичга 50 та ўйинда эришган.
Маълумот учун, “Бавария” Германия Бундеслигаси турнир жадвалида биринчи ўринда бормоқда. Жамоа 11 учрашувда 29 очко жамғарган. Навбатдаги турда Мюнхен клуби Дортмунднинг “Боруссия”си билан учрашади. Ушбу учрашув 30 ноябрь куни бўлиб ўтиши режалаштирилган.
