Серхио Агуэро “Барселона”дан 3 миллион евро талаб қилмоқда.
Аргентина терма жамоасининг собиқ ҳужумчиси клуб унга бир мавсум учун маошини тўлаб бериши керак деб ҳисоблайди.
2021 йил ёзида Агуэро шартномаси якунига етгани учун “Манчестер Сити”ни тарк этиб, каталонияликлар сафига ўтган эди ва 2 йиллик шартнома имзолаганди. У “кўк-анорранглилар” сафида 5 та ўйин ўтказиб, битта голга муаллифлик қилган.
Ўша йилнинг октябрь ойида Ла Лига доирасида “Алавес”га қарши ўйиннинг (1:1) 41-дақиқасида Серхио кўкрагида нохушликни ҳис қилгани учун майдонни тарк этганди. Шундан сўнг клуб Агуэро юраги билан боғлиқ муаммолар сабабли 3 ой майдонга тушмаслигини маълум қилганди. 15 декабрь санасида эса футболчи фаолиятини якунлаганини эълон қилган.
Агуэро иккинчи мавсум учун тўланиши керак бўлган пуллардан тўлиқ воз кечган ва биринчи мавсум учун пуллар тўлаб берилиши кутмоқда. “Барселона” унинг талабига рози бўлган, бироқ 3 миллион еврони суғурта орқали тўламоқчи бўлган.
Суғурта компанияси эса Агуэро “Барселона”га ўтишидан олдин юраги билан боғлиқ муаммоси бўлганини айтиб, тўловни қилишдан бош тортди. Футболчи томон эса бунга қўшилмаган ва испан клубига ўтишидан олдин бундай муаммо бўлмаганини таъкидлаган.
“Кўк-анорранглилар” Агуэрога пулни тўламаган ва бир муддат вақт ўтиб, футболчи клубни судга берган. Ҳозирча суд жараёни бошланмаган, Агуэро эса бу масалани ортиқча шовқинларсиз ҳал қилмоқчи.
