Ўзбекистон бокс федерацияси раисининг биринчи ўринбосари Сакен Полатов, Ўзбекистон бокс федерацияси мутасаддилари, Ўзбекистон терма жамоаси мураббийлари ва боксчилар иштирокида йиғилиш 27 сентябрь, жума куни бўлиб ўтди.
Йиғилишда катталар ўртасидаги Осиё чемпионатида терма жамоанинг иштироки ва Париж Олимпиада цикли сарҳисоб қилинди ва мураббийларнинг ҳисоботлари тингланди. Аёллар терма жамоамизни кучайтириш ва кейинги мусобақаларга пухта тайёрлаш тўғрисида ҳам сўз борди.
Яқинлашиб келаётган катталар ўртасидаги Ўзбекистон чемпионатини тартибли ўтказиш ва қитъа биринчилигида боксчиларимиз умумжамоа ҳисобида юқори натижалар қайд этиши кераклиги ҳам йиғилиш мавзусидан жой олди.
Йиғилиш давомида, ҳаваскор боксдаги фаолиятини якунлаган терма жамоа сардори икки карра Олимпиада ва Жаҳон чемпиони Баҳодир Жалоловнинг ўрнига, жамоа сардорлиги яна бир икки карра Олимпиада ва Жаҳон чемпиони Ҳасанбой Дўстматовга топширилди.
