Икки карра Олимпия ўйинлари ғолиби Баҳодир Жалолов Париждаги Олимпия ўйинларида олтин медални қўлга киритгач, ҳаваскор боксдаги фаолияти якунига етганини айтди. Бундан ташқари, спортчи эндиликда унинг вазнида ким мусобақаларда иштирок этишини маълум қилди.
“Орқамизда ёш укаларимиз, хусусан Жаҳонгир укамиз бор, (Жаҳонгир Зокиров) унга омад тилаймиз. Укамизга ўзимиз кўп нарсани ўргатиб, қўллаб-қувватлаб турибмиз. Кейинги Олимпиадада у чемпион бўлади, деб ўйлайман. Биз энди оғир вазнни ҳеч кимга бермаслигимиз керак”, деди Жалолов.
Ўзбек боксчиси Баҳодир Жалолов Олимпиадада ҳеч ким уддаламаган ишни бажарди. Унгача ҳеч ким супер оғир вазн тоифасида икки бор Олимпиада олтин медалини қўлга киритмаган.
14 апрель куни Humo Arena’да IBA’нинг “Чемпионлар оқшоми” турнири бўлиб ўтди. Ушбу бокс кечасида Баҳодир Жалолов ҳам қатнашиши керак эди. Аммо спортчининг жароҳати борлиги сабаб унинг ўрнини Жаҳонгир Зокиров эгаллади. Хорватиялик Смакичи Агронга қарши жанг қилган ёш ўзбек спортчиси очколар эвазига рақибини мағлубиятга учратган эди.
