Бутун дунё бўйлаб уй-жойларнинг қисқа муддатли ижараси мавжуд бўлган Аirbnb онлайн платформаси ажойиб эълон берди. Иcоns янги лойиҳа дастури асосида компания мультфильмлар ва комикслардаги уйларнинг нусхасини яратмоқда. Лойиҳага кўра, биринчи бўлиб “Юқорига” мультфильмидаги учар уй қуриб битказилди. Бу ҳақда Europa Plus нашри хабар берди.
Учар уй биноси Нью-Мексико штатининг Абикиу шаҳрида жойлашган. Уйни минглаб шарлар осмонга кўтариб тургандек кўринади, лекин аслида хонадон махсус қурилиш крани орқали юқорига кўтариб қўйилган.
Ижара ҳақидаги эълонда уй эгаси қуйидаги сўзларни ёзиб қолдирган:
Марҳамат, мен ва азизим Элли билан бирга қурган шинам уйимизга ташриф буюринг. Бу ерда ҳаётимдаги энг катта саргузаштларим бўлиб ўтган. Шуни англадимки, барча яхши ва қадрли ҳодисалар энг яқин инсонларингиз билан содир бўлади, — дейилади эълонда.
Учар уйнинг интерьерида ҳам “Юқорига” мультфильмидаги барча элементлар мавжуд. Хонадондаги ҳар бир мебель ва предметлар қўл меҳнати ҳисобланади.
15 метр баландликка кўтарилган ва 8000 дан ортиқ шарлар билан безатилган мазкур уй 14 майдан бошлаб ўз эшикларини очади. Манбаларга кўра, бир кунлик ижара ҳақи бир киши учун ўртача 100 долларни ташкил қилади.
