Қирғизистон яқин 11 йил ичида ташқи қарзини тўлиқ тўлаш ниятида. Бу ҳақда республика президенти Садир Жапаров “Кабар” давлат ахборот агентлигига берган интервьюсида маълум қилди.
“2035 йилгача тўпланиб қолган 5 миллиард долларлик ташқи қарзимизни тўлаймиз. Тўлов муддати жамоамнинг иш даврига тўғри келди. Худога шукур, бизда бунга куч бор. Иқтисодиётимиз яхшиланди. Мамлакатда тинчлик ва барқарорлик бор экан, биз бемалол қарзимизни узамиз”, — деди у.
Садир Жапаровга кўра, давлат олинган ҳар бир долларни аниқ лойиҳаларга жалб қилади.
“Уларни ўз-ўзини таъминлайдиган лойиҳалар учун сарфлаймиз. Битта мисол келтираман: Қамбарота 1 ГЕС қурилишига 5-6 миллиард доллар сарфланади. Энг муҳими, 2035 йилга бориб аввал юзага келган қарзларни тўлиқ тўлаймиз. Келажакда қанча қарз олмайлик, ҳар бир лойиҳа ўзини оқлайди”, — деди у.
Қирғизистон Молия вазирлиги маълумотларига кўра, республиканинг давлат қарзи қарийб 6 миллиард долларни ташкил этади, шундан 4,5 миллиард доллари ташқи қарз, 1,5 миллиард доллари эса ички қарздир.
