Бритни Спирс турмуш қурганидан 14 ой ўтиб ажрашаётганини маълум қилди, деб ёзмоқда “Правила жизни” нашри.
Маълум бўлишича, Сем Асгари Бритнига ажрашишни таклиф қилган, у хонандани хиёнатда айблаган. Бундан ташқари, у рафиқасининг айрим хатти-ҳаракатларига чидашдан чарчаган, деб таъкидлайди таблоид.
Асгари аллақачон хонанда билан бирга яшаган уйидан бошқа жойга кўчиб ўтган. Ўз навбатида, Спирс ҳам ажрашиш билан боғлиқ ишлар билан шуғулланиш учун “орзусидаги юристлар” жамоасини ёллаган, деб ёзмоқда Variety нашри. Ҳозирча жуфтлик ажрашаётгани ҳақидаги хабарга изоҳ бермаган.
Маълумот учун, Асгари — фитнес-тренер, модел ва актёр. У Спирс билан 2016 йилда Slumber Party клипининг суратга олиш майдончасида танишган. Шундан кейин кўп ўтмай уларнинг муносабатлари оммага ошкор бўлган. Поп қўшиқчи ва фитнес-мураббий ўртасидаги муносабатлар қарийб беш йилдан буён давом этиб келаётганди.
Улар 2022 йилнинг 9 июнь санасида қўшиқчининг Тhousand Oaks номли уйида кўплаб гувоҳлар қаршисида никоҳ узукларини алмашган эди.
Тўйга таклиф этилган меҳмонлар орасида Бритнининг онаси Линн Спирс, отаси Жеймс Спирс ва синглиси Жейми Линн Спирс бўлмаган (фақат укаси Брайан таклиф этилган). Маросимда Мадонна, Дрю Бэрримор, Пэрис Хилтон, Селена Гомес ва қўшиқчининг келин кўйлаги муаллифи Донателла Версаче иштирок этган.
Жуфтлик 2021 йилнинг сентябрь ойида, Бритни отасининг 13 йиллик васийлигидан қутулганидан сўнг унаштирилган эди. Спирс мухлисларини ўз режалари ҳақида ижтимоий тармоқлар орқали хабардор қилиб борган. Шундан кейин у Асгари билан Кабо, Канкун, Лас-Вегас ва Гаваида ҳордиқ чиқариб келган.
Таъкидлаш керакки, бу ҳозирда 40 ёшни қаршилаган поп-қўшиқчининг учинчи марта оила қуриши ҳисобланади. 2004 йилда у болаликдаги дўсти Жейсон Александрга турмушга чиққанди. Бироқ 55 соат давом этган никоҳ бекор қилинган ва қўшиқчи “аҳмоқлик қилиб қўйганини” тан олган.
Бир неча ой ўтиб, у Голливуддаги Жосепҳ клубида танишиб қолган ўйинчи Кевин Федерлайнга турмушга чиққан. Улар 2007 йилга қадар бирга яшаб, икки нафар фарзандни тарбиялаган.
