Душанба кунги савдоларда Европада газ нархи 1 000 куб метр учун 1 400 доллардан пастга тушди. Бу ҳолат июнь охиридан бери биринчи марта қайд этилди, дея хабар бермоқда Bloomberg.
Нидерландиядаги ТТФ марказида ноябрь фьючерслари нархи 1 000 куб метр учун 1 343 долларгача тушди. Бу 29 июндан бери энг паст даражадир. Кун бошидан буён газ нархининг умумий пасайиши 6,9 фоизни ташкил қилди.
Нархларнинг пасайиши Европа Иттифоқидаги газ захираларининг максимал даражага яқинлашиши, минтақада нисбатан илиқ об-ҳаво бўлаётгани ва электр энергиясини ишлаб чиқаришда шамол электр станцияларининг ўртача улуши сезиларли даражада ошиши билан боғлиқ.
Шундай бўлса-да, Украинада кучайиб бораётган уруш мамлакат орқали ўтадиган газ таъминотининг узилиши хавфини олиб келишда давом этмоқда.
Украина президенти аппарати раҳбари Андрей Ермакнинг сўзларига кўра, душанба куни эрталаб Киев марказида Россия камикадзе дронлардан фойдаланганидан сўнг портлашлар содир бўлган.
Ҳозирча транзит оқимлари сўнгги бир неча ой ичида пастроқ даражада бўлса-да, барқарорлигича қолмоқда.
