Ўзбекистон мустақиллигининг 31 йиллиги арафасида Тошкентдаги Тасвирий санъат галереясида жамоат арбоби, ўзбек драматургияси асосчиси Маҳмудхўжа Беҳбудий хотирасига бағишлаб «Самарқанддан мактублар» номли кўргазма ташкил этилган эди. «Дарё» фотомухбири ушбу кўргазмадан фотожамланма тайёрлади.
Маълумот учун, «Самарқанддан мактуб» 1903 йилдан бошлаб «Туркистон вилояти газетаси» учун жадидчиликнинг ёрқин намоёндаси томонидан юборилган туркум мақолалар тўплами бўлиб, унда миллатни зулматдан нурга элтувчи илм ва тараққиёт ғоялари ҳақида Беҳбудийнинг фикрлари батафсил баён этилган.
Кўргазма Қрим, Боғчасаройнинг қадим суратлари, Исмоилбей Ғаспирали ва Беҳбудийнинг портретларидан бошланади. «Таржимон» газетасининг фотонусхалари Ғаспирали ва Беҳбудийнинг мақолаларидан олинган парчалар билан бирга қўйилган. Самарқанднинг профессор Прокудин Горскийнинг альбомидан ўрин олган суратлари ва тадқиқотчи Самуил Дудиннинг 1902 йилдаги фотоархивлари кўргазма мақолаларини бойитиб турибди. Уларнинг ҳар бирига Беҳбудийнинг Туркистон ҳақидаги мақолаларидан парчалар бириктирилган.
Кўргазма залининг марказида «Падаркуш» спектаклининг биринчи саҳнаси учун декорациялар рамзи сифатида Самарқанд мактаби сўзаналари, кийимлар, патнис ва сандиқлар жойлаштирилган. Умуман, кўргазмада Беҳбудийнинг 200 дан ортиқ мақолалари, мактублари, саёҳат эсдаликларидан танлаб олинган иқтибослар келтирилган. Ташриф буюрувчилар архив материаллари, фотосуратлар, ўқув қўлланмалари, Самарқанд мактаби амалий санъат намуналарини ҳам кўриши мумкин.
