Хитойнинг Vivo компанияси асосий камера модули силжийдиган Х60 Pro+ флагманини тақдим этди. Бу каби ечим видеога олиш сифатини яхшилашга хизмат қилади, деб ёзади «Afisha.uz».
Смартфоннинг олд қисмида Full HD+ сифатга эга ва 120 герц янгиланиш частотасини қўллаб-қувватловчи 6,56 дюймли AMOLED-экран жойлашган. Бармоқ изи сканери дисплей остида, экраннинг юқори марказидаги қирқимдан эса 32 мегапикселли фронтал камера ўрин олган.
50 мегапикселли асосий модуль Big Eye барқарорлаштиргичи билан жиҳозланган, яъни мазкур технология сенсорга механик силжиш орқали бир маромда суратга олиш имконини беради. Асосий камера қўшимча 48 мегапикселли кенг бурчакли объектив, 8 мегапикселли телефото ва портретлар учун мўлжалланган 32 мегапикселли камерага эга. Бутун тизим лазерли автофокус ва учталик LED-чақноқ билан жиҳозланган.
Vivo Х60 Pro+’га Snapdragon 888 процессори, 8/12 гигабайтли LPDDR5 тезкор ҳамда 128 ёки 256 гигабайтли ички хотира ўрнатилади. Аккумулятор сиғими 4200 мА/соат бўлиб, у 55 ваттли тезкор қувватланиш функциясига эга. Шунингдек, смартфонда контактсиз тўловлар учун NFC модули, 5G, Bluetooth 5.1 ва Wi-Fi 6 бор.
Хитойда Vivo Х60 Pro+ 30 январдан 770 доллар нархида сотувга чиқади, 12/256 ГБ версиясини 925 долларга харид қилиш мумкин бўлади.
Аввалроқ Vivo компанияси ечиладиган қўшимча камерали телефон концептини тақдим этгани тўғрисида хабар берилганди.Мавзуга доир: Vivo орқа панелининг ранги ўзгарадиган смартфон яратиш устида иш олиб бормоқда (видео)
