Microsoft Corp. смартфонлар ишлаб чиқариш билан шуғулланувчи бўлинмасини қайта ташкил этиш доирасида 12 ой давомида яна 2 850 та иш ўрнини қисқартиради. Бу ҳақда «Интерфакс» хабар беради.
«2016 йилнинг майида эълон қилинган 1 850 та позицияни тугатишга қўшимча равишда аввал маълум қилинган режани амалга ошириш доирасида йил давомида дунё бўйича тахминан 2 850 та иш ўрни қисқартирилади. Бу ҳаракатлар 2017-молиявий йилнинг охирига қадар якунланади», — дейилади Microsoft хабарида.
Microsoft учун 2017-молиявий йил 2016 йилнинг 1 июлида бошланган эди ва у 2017 йилнинг 30 июнида якунланади.
Компания вакили умумий сотув бўлимидан 900 киши аллақачон бўшатилганлигини маълум қилди. Қолган қисқартиришлар сотувларни ташкил этиш соҳаси ва мобил телефонларни ишлаб чиқариш бўлимига тегишли бўлади.
