«Radar.uz» томонидан 4 август куни мониторинг ўтказилган ва шу вақт давомида 85 та қўпол қоидабузарлик аниқланган чорраҳага камералар ўрнатила бошланди.
Сўнгги бир неча ҳафта давомида ижтимоий тармоқлар аъзолари бир қанча марказий кўчаларда йўл ишлари олиб борилаётгани, ишлар давомида йўллар ёпиб қўйилаётгани ҳақида хабар бермоқда. Интернет-фойдаланувчиларнинг фикрича, бу ишлар давомида чорраҳаларда автомобиль ҳаракатини тартибга солиш мақсадида кузатув камералари ўрнатилмоқда.
Худди шундай ишлар КҲАЙ/Бодомзор йўли чорраҳасида бир неча кундан буён олиб борилмоқда. «Дарё» мухбирига йўл ишлари олиб борилаётган жойдан хабар беришларича, ушбу чорраҳага кузатув камералари ўрнатилмоқда. Йўл ишлари тендерда ғолиб бўлган ташкилот томонидан амалга оширилмоқда.
Қурувчиларнинг таъкидлашича, шаҳардаги камералари ёзиб олган видеотасвир Йўл ҳаракати хавфсизлиги бош бошқармасига узатилади. Камералар қачон ишга тушиши ҳақида расмий маълумот йўқ.
Эслатиб ўтамиз, «Radar.uz» томонидан КҲАЙ/Бодомзор йўли чорраҳасида мониторинг 4 август, душанба куни соат 18:00 дан 19:00 га қадар ўтказилган бўлиб, ушбу муддат оралиғида 85 та қоидабузарлик ҳолатлари аниқланган эди.
Умид қиламизки, ўрнатилаётган камералар йўл ҳаракатини тартибга солиш, қоидабузарликларни камайтириш, қоидабузарларни эса муносиб жазолаш учун хизмат қилади.
