Crittercism таҳлил компанияси мобил дастурларнинг тури ва қўлланадиган операцион тизими билан боғлиқ ҳолда ишлаш барқарорлиги бўйича тадқиқот олиб борди. Таҳлил учун бир ой муддат мобайнида бир миллиард нафар фойдаланувчи маълумотларидан фойдаланилди. Бу тўғрида компания эълон қилган натижаларга асосланиб «Цукерберг позвонит» сайти хабар берган.
Эълон қилинган рейтингга кўра, iOS учун яратилган дастурлар Android’га ўрнатилувчи дастурларга нисбатан кўпроқ ишламай қолар экан.
Android тизимининг турли версиялари ичида энг барқарори 4.4 KitKat бўлса, дастурларнинг ишлаши бўйича энг «чидамли»си Samsung Galaxy S4 бўлиб чиқди: унда дастурлар ишламай қолиши 0,9 фоизни ташкил этган. Етакчи Android-қурилмалар орасида дастурлар энг кўп (1,7 фоиз ҳолатда) ишламай қоладигани эса Nexus 7 планшети экан.
iOS-қурилмаларга келсак, энг барқарор ишлайдигани – ҳозирда ишлаб чиқарилмаётган iPhone 5; дастурлари энг кўп бузилиб қоладигани эса iPad 2 бўлиб чиққан. Таъкидлаш керакки, Apple ўз мобил операцион тизимининг барқарорлигини анча яхшилаган: iOS 7.0 версиясида дастурлар ишламай қолиши 2,1 фоиз бўлса, 7.1 версиясида бу кўрсаткич 1,6 фоизга тушган.
Дастурларнинг энг кўп бузилиб қоладиганлари ўйинлар бўлиб, улар 4,4 фоиз ҳолатда ишламай қолади. Энг ишончлилари эса интернет-тижорат дастурларидир: уларда бу кўрсаткич 0,4 фоизга тенг.
Юқоридагилардан келиб чиқиб, Crittercism мобил дастур ишлаб чиқарувчилар уларнинг барқарорлигига алоҳида эътибор қаратишлари лозимлигини таъкидлайди. Шу билан бирга, тезлик масаласи ҳам аҳамиятга эга, дейилади хабарда.
