Samsung ва Apple ўртасида навбатдаги «патент жанглари» бошланди. Аввал бўлганидек, айни вақтдаги суд жараёнида ҳам Apple’нинг кўплаб қизиқарли ички ҳужжатларига дуч келинди. Samsung адвокатлари томонидан тақдим этилган ана шундай ҳужжатларнинг биридан маълум бўлишича, Apple Android-қурилмалар билан рақобатга киришишдан хавфсирайди. Бу ҳақда Mail.ru хабар берди.
Жумладан, Apple вакилларининг эътироф этишича, техник имкониятлар ва дастурий таъминот жиҳатидан Android-смартфонлар iPhone’га етиб олмоқда. Ҳужжатда «рақобатчилар сезиларли тарзда девайсларнинг таснифи ва қайсидир жиҳатдан, унинг экотизимини яхшилагани» айтиб ўтилган.
Apple ўз ички ҳужжатида тан олишича, iPhone’га энг сезиларли хавфни катта дисплейга эга қурилмалар ва арзон девайслар туғдирмоқда. Айни бир вақтда iPhone’нинг унчалик катта бўлмаган қиммат смартфонлари харидорларни у даражада жалб этаётгани йўқ. Бу ҳолатда Apple iPhone 6 қурилмаси дисплейининг диагоналини 4,7 дюймгача кенгайтиришга интилаётганига табиий ҳол сифатида қараш мумкин.
Apple рақобатчилари маркетингга маблағ ажратиш борасида компаниядан сезиларли равишда илгарилаб кетмоқда. Маркетингга ажратилаётган маблағлар келажакда Apple рақобатчиларига муваффақият келтириши мумкин. Бу эса Apple вакилларини ташвишлантирмасдан қолмайди. Бундан ташқари, Apple вакиллари ўз тарғиботидан қониқмаяпти. Хабарда айтилишича, айнан шу жиҳатни ҳисобга олган ҳолда, ўтган йилнинг бошида компания 1997 йилдан бери ҳамкорлик қилиб келаётган Media Arts Lab реклама компанияси хизматларидан воз кечган. Маълумки, ушбу компаниянинг йирик менежерлари Apple’нинг маркетинг бўйича вице-президенти Фил Шиллер билан зиддиятга борган эди.
