Sony компанияси Сиднейдаги ҳайвонот боғига бир нечта QX10 камераларини тақдим этди. Улар ёрдамида коалалар ўзларини суратга олишни ўрганишган, дея хабар қилади Daily Mail.
TJournal нашрининг ёзишича, Сиднейдаги Wild Life ҳайвонот боғидаги Брюс, Аарон ва Билл лақабли коалалар энди интернет «юлдузи»га айланиб кетишлари мумкин. Уларнинг катакларига ўрнатилган Sony QX10 камералари Wi-Fi ёрдамида смартфонга улана олади. Жониворлар камера олдига келганида, ҳаракатларни илғаб олувчи датчиклар ишлаб кетиб, камера суратга олади.
Қизиқувчан коалалар камерага қизиқиб, у билан ўйнаб кўришга ҳаракат қилишади. Шу тариқа оддий кишилар ўзини суратга олиб селфи қилишганидек, коалалар селфиси пайдо бўлади. Бу суратлар автоматик тарзда #KoalaQXselfie хештеги билан ҳайвонот боғининг расмий Instagram-аккаунтида жойланмоқда ва улар кўпчиликка маъқул бўлмоқда.
«Ҳайвонот боғимизга ташриф буюрувчиларнинг кўпчилиги коалаларни суратга олишади ва ўзлари ҳам улар билан бирга расмга тушишади, – дейди Wilde Life’нинг сутэмизувчилар бўлими бошлиғи Кайли Хекшелл. – Энди улар ўзлари ўзларини суратга тушириб, ўз ҳаётларининг айрим лаҳзаларини мангуликка муҳрлаб қўя оладиган бўлишди».
