Ayni kunlarda ijtimoiy tarmoqlarda xonanda Botir Qodirov va Zohirshoh Jo‘rayev o‘rtasidagi sud jarayonlari ko‘plab muhokamalarga sabab bo‘lmoqda. Jurnalist Jasur Hamroyev madaniyat vaziri Ozodbek Nazarbekovning bu boradagi fikrlari bilan qiziqdi.
— Nima bo‘lganda ham uchta tirrancha bir buyuk ijodkorni muhokamaga qo‘yib, tirigida ham, o‘limidan keyin ham bunday qilishga haqqi yo‘q edi. Uchta tirrancha o‘z nafsi, maqsadi yo‘lida buyuk xilqatga nisbatan bunday qilishlari noto‘g‘ri. Bu masalada meni uchalasiga nisbatan eʼtirozim bor. Sherali Jo‘rayev ustoz sanʼatkor sifatida bunday muhokamalarga loyiq emasdi. Bular ehtiyot bo‘lishi kerak, birgina qilgan ishi yoki aytadigan gapi otasiga “minus” bo‘lmasligi haqida o‘ylab ko‘rishi kerak. Hammasiga aytyapman: “Hali obro‘ topib, bir narsani qoyillatgan joylaring yo‘q. Bugun kim seni hurmat qilsa, otang uchun qilyapti”. Shundan foydalanib, u insonning loyga chaplanishiga sabab bo‘lish yaxshi emas. Bu muhokamalarning kelib chiqishida uchta yigitning ham aybi bor. Men bunga qarshiman, chunki ustoz sanʼatkor bunday muhokamalarga qolmasligi kerak. U insonning ruhining “loy”lanib qolishidan ehtiyot bo‘lish kerak, — deydi Ozodbek Nazarbekov.
Madaniyat vaziri jurnalistning “Botir Qodirovning otasi kim?” degan savoliga quyidagicha javob berdi:
— Men bilmayman, bunga hech qiziqmaganman. Umumiy hamma biladigan gaplarni eshitganman xolos. Lekin biror marta “Bu yoqqa kel-chi, aslida nima bo‘lgan”, deb gaplashmaganman. Bu borada gaplashish niyatim ham yo‘q. Chunki bu men aralashadigan ish ham emas, — deydi madaniyat vaziri.
Jurnalistning keyingi paytlarda Botir Qodirov ijodida Sherali Jo‘rayevga nisbatan taqlid sezilayotgani haqidagi savoliga Ozodbek Nazarbekov quyidagicha javob berdi:
— Ijodkor avvalo o‘zini topishga intilishi kerak. To‘g‘ri, har qanday sanʼatkor ijodni taqliddan boshlaydi. Bu tabiiy. Lekin kezi kelganida o‘zini izlab topishi kerak. Sherali Jo‘rayevning soyasida yurish bir umr shunday qolishga sabab bo‘ladi, — deydi Ozodbek Nazarbekov.
Izoh (0)