Qisqalik — iste’dod belgisi. Bu ayniqsa badiiy adabiyotda yaqqol seziladi. Qisqa, ixcham iboralar bilan mazmunli, ta’sirli, qiziqarli asar yaratish uchun ijodkordan katta mehnat, yuksak iste’dod va mahorat talab etiladi.
Mashhur yozuvchi Ernest Xeminguey har qanday insonni ta’sirlantiradigan, o‘zi atigi olti so‘zdan iborat hikoya yoza olishdan bahs boylashib, yutib chiqqani haqida ko‘pchilik o‘qigan yoki eshitgan bo‘lsa kerak. Uning hikoyasi quyidagicha edi:
“Bolalar poyabzali sotiladi. Kiyilmagan...” (Hikoyaning asl matni: “For sale: baby shoes, never used”).
“Daryo” internet nashri yurtdoshlarimiz orasida kitobxonlikka qiziqishni oshirish, iste’dodli insonlarga o‘z mahoratini sinovdan o‘tkazish uchun imkoniyat taqdim qilish maqsadida, qisqa hikoyalar tanlovini e’lon qiladi.
Tanlovda yoshi va jinsidan qat’i nazar, barcha xohlovchilar ishtirok etishi mumkin.
Shartlar quyidagicha:
- Hikoyalar hajmi 55 ta so‘zdan oshmasligi kerak;
- Hikoyaning sarlavhasi bo‘lishi shart, shuningdek, mazmunan tugallangan bo‘lishi lozim;
- Hikoya muallifining ismi-familiyasi va qaysi hududdan ekani to‘liq yozilishi kerak.
Hikoyalar istalgan janrda yozilishi mumkin. O‘z ijod namunalaringizni @daryo_hikoyalar_bot orqali jo‘nating.
Tanlov 30-may sanasiga qadar davom etadi. Tahririyatga yuboriladigan eng sara hikoyalar hafta davomida e’lon qilib boriladi. Tanlov so‘nggida tahririyat tomonidan tanlab olingan hikoyalar ovozga qo‘yiladi va sayt obunachilari tomonidan eng ko‘p ovoz to‘plagan hikoya mualliflari g‘olib deb topiladi.
G‘oliblarga “Daryo” internet nashrining hamkori bo‘lgan Asaxiy internet do‘koni tomonidan taqdim qilingan sovg‘alar topshiriladi.
1-o‘ringa — 30 ta kitob
2-o‘ringa — 20 ta kitob
3-o‘ringa — 10 ta kitob
Asaxiy internet do‘konida sotuvda bo‘lgan kitoblar bilan quyidagi havola orqali tanishish mumkin.
Ilhom parisini ishga solib, o‘z imkoniyatingizni sinab ko‘ring!
Izoh (0)